ՂՈՒԿԱՍ 7

Հարիւրապետին ծառային բժշկութիւնը
(Մտ 8.5-13, Յհ 4.46-54)

¹Յիսուս ժողովուրդին իր բոլոր ըսելիքները վերջացնելէ ետք Կափառնաում գնաց։ ²Հոն Հռոմայեցի հարիւրապետ մը կար, որուն ծառան, որ շատ սիրելի էր իրեն, մահամերձ հիւանդ էր։ ³Հարիւրապետը երբ լսեց Յիսուսի մասին, քանի մը Հրեայ երէցներ ղրկեց անոր, խնդրելով որ գայ եւ փրկէ ծառան։ ⁴Երէցները եկան Յիսուսի մօտ եւ թախանձագին խնդրելով, ըսին.
– Արժանաւոր մէկուն է որ բարիք պիտի ընես. ⁵անիկա մեր ազգը կը սիրէ եւ ինքն էր որ մեզի համար ժողովարան շինեց։
⁶Յիսուս անոնց հետ գնաց։ Երբ մօտեցած էր տան, հարիւրապետը իր բարեկամները ղրկեց, որպէսզի անոր ըսեն.
– Տէ՛ր, մի՛ յոգնիր. ես արժանի չեմ քեզ իմ յարկիս տակ ընդունելու. ⁷ահա թէ ինչո՛ւ ինքզինքս արժանի չգտայ քեզի գալու։ Միայն հրահանգ մը տուր եւ ծառան պիտի առողջանայ։ ⁸Որովհետեւ ես ալ, որպէս իշխանութեան ենթակայ մարդ մը՝ ձեռքիս տակ զինուորներ ունիմ. մէկուն կ՚ըսեմ՝ «Գնա՛» եւ կ՚երթայ, ուրիշի մը կ՚ըսեմ՝ «Եկո՛ւր» եւ կու գայ. ծառայիս կ՚ըսեմ՝ «Ատիկա ըրէ» եւ կը կատարէ։
⁹Յիսուս երբ լսեց ասիկա, հիացաւ անոր վրայ, եւ դառնալով իրեն հետեւող բազմութեան, ըսաւ.
– Իրապէ՛ս կ՚ըսեմ ձեզի, թէ նոյնիսկ Իսրայէլի մէջ այսչափ հաւատք չգտայ։
¹⁰Պատգամաւորները տուն վերադարձան եւ հիւանդ ծառան բժշկուած գտան։

Այրի կնոջ որդիին յարութիւնը

¹¹Յաջորդ օր Յիսուս ճամբայ ելաւ՝ Նային կոչուած քաղաքը երթալու համար։ Իրեն կ՚ընկերանային իր աշակերտները եւ բազմաթիւ ժողովուրդ։ ¹²Հազիւ քաղաքին դարպասին մօտեցած էր, ահա անկէ դուրս կը հանէին մեռել մը, որ այրի մօր մը մէկ հատիկ զաւակն էր։ Քաղաքի ժողովուրդէն շատեր անոր կը հետեւէին։ ¹³Տէրը երբ կինը տեսաւ, գթաց անոր եւ ըսաւ.
– Մի՛ լար։
¹⁴Ապա մօտեցաւ եւ դպաւ դագաղին։ Դագաղը շալկողները կանգ առին։ Յիսուս ըսաւ.
– Պատանի՛, քեզի կ՚ըսեմ՝ ե՛լ։
¹⁵Մեռած պատանին ելաւ նստաւ եւ սկսաւ խօսիլ։ Յիսուս զայն յանձնեց մօրը։
¹⁶Բոլորն ալ վախցան եւ փառաւորեցին զԱստուած՝ ըսելով.
– Մեծ մարգարէ մը յայտնուեր է մեր մէջ, Աստուած իր ժողովուրդը փրկելու եկեր է։
¹⁷Եւ Յիսուսի մասին այս լուրերը տարածուեցան Հրէաստանի եւ անոր շրջակայքին մէջ։

Յովհաննէս Մկրտիչի պատգամաւորները
(Մտ 11.2-6)

¹⁸Երբ Յովհաննէսի աշակերտները այս բոլորին մասին պատմեցին իրեն, ¹⁹Յովհաննէս իր աշակերտներէն երկուքը քովը կանչելով՝ զանոնք Յիսուսի ղրկեց, հարցնելու համար.
– Դո՞ւն ես ան՝ որ պիտի գար, թէ ուրիշի մը սպասենք։
²⁰Աշակերտները եկան եւ Յիսուսի ըսին.
– Յովհաննէս Մկրտիչը մեզ քովդ ղրկեց՝ հարցնելու համար, թէ «Դո՞ւն ես ան՝ որ պիտի գար, թէ ուրիշի մը սպասենք»։
²¹Նոյն այդ ժամուն Յիսուս շատեր իրենց հիւանդութիւններէն, ցաւերէն եւ չար ոգիներէն բժշկեց, ինչպէս նաեւ շատ մը կոյրերու տեսողութիւն պարգեւեց։ ²²Ապա Յովհաննէսի ղրկած երկու աշակերտներուն ըսաւ.
– Գացէք եւ Յովհաննէսի պատմեցէք ինչ որ տեսաքու լսեցիք. ահա կոյրերը կը տեսնեն, կաղերը կը քալեն, բորոտները կը մաքրուին, խուլերը կը լսեն, մեռելները յարութիւն կ՚առնեն եւ Աւետարանը աղքատներուն կը քարոզուի։ ²³Երանի՜ անոր որ իմ պատճառովս իր հաւատքը չի կորսնցներ։

Յիսուսի կարծիքը Յովհաննէսի մասին
(Մտ 11.7-19)

²⁴Երբ Յովհաննէսի պատգամաւորները մեկնեցան, Յիսուս Յովհաննէսի մասին սկսաւ խօսիլ ժողովուրդին, ըսելով.
– Ի՞նչ տեսնելու գացիք անապատ. հովէն շարժող եղէ՞գ մը։ ²⁵Հապա ի՞նչ տեսնելու գացիք. փափուկ հագուստներ հագած մա՞րդ մը։ Բայց անոնք որ փառաւոր հագուստ կը հագնին եւ ճոխութեան մէջ կ՚ապրին, անոնք արքունի պալատներուն մէջ են։ ²⁶Հապա ի՞նչ տեսնելու գացիք. մարգարէ՞ մը։ Այո՛, վստա՛հ եղէք, նոյնիսկ աւելի քան մարգարէ մը։ ²⁷Որովհետեւ Յովհաննէսի մասին է որ մարգարէութեան մէջ Տէրը կ՚ըսէ.–
«Ահա պատգամաւորս քու առջեւէդ պիտի ղրկեմ, որ քեզի համար ճամբայ պատրաստէ»։
²⁸Վստահ եղէք, մարդոց մէջ Յովհաննէսէն մեծ մարգարէ չէ ծնած, սակայն Աստուծոյ արքայութեան մէջ յետին եղողը Յովհաննէսէն աւելի մեծ է։
²⁹Ամբողջ ժողովուրդը, ինչպէս նաեւ մաքսաւորները, որոնք մկրտուած էին Յովհաննէսէն, երբ այս խօսքերը լսեցին՝ ճանչցան Աստուծոյ արդար ծրագիրը։ ³⁰Իսկ Փարիսեցիներն ու Օրէնքի ուսուցիչները, որոնք Յովհաննէսէն չէին մկրտուած, մերժեցին ինչ որ Աստուած ծրագրած էր իրենց համար։
³¹Ապա Յիսուս շարունակեց.
– Որո՞ւ նմանցնեմ այս սերունդի մարդիկը. որո՞ւ կը նմանին։ ³²Կը նմանին այն փոքրիկներուն, որոնք հրապարակի վրայ կը նստին եւ իրարու ձայն կու տան, ըսելով. «Մենք նուագեցինք՝ բայց դուք չպարեցիք. ողբի երգեր երգեցինք՝ բայց դուք չլացիք»։ ³³Յովհաննէս Մ կրտիչը եկաւ, ո՛չ հաց կ՚ուտէր, ոչ գինի կը խմէր, կ՚ըսէք. «Դիւահար է»։ ³⁴Մարդու Որդին եկաւ, կ՚ուտէ ու կը խմէ, եւ կ՚ըսէք. «Ուտող ու խմող է այս մարդը, մաքսաւորներուն եւ մեղաւորներուն՝ բարեկամ»։ ³⁵Բայց արդարութեան հետեւորդները կրնան հասկնալ Աստուծոյ իմաստութիւնը։

Յիսուս Փարիսեցի Սիմոնին տան մէջ

³⁶Փարիսեցիներէն մէկը Յիսուսէն կը խնդրէր որ միասին ճաշեն։ Յիսուս գնաց անոր տունը եւ նստաւ ուտելու։ ³⁷Քաղաքին մէջ պոռնիկ կին մը կար, որ երբ լսեց թէ Յիսուս Փարիսեցիին տունն է, անուշահոտ ազնիւ իւղի շիշ մը առնելով՝ Փարիսեցիին տունը եկաւ. ³⁸ետեւի կողմէն Յիսուսի ոտքերուն մօտ կեցած՝ կու լար, արցունքներով անոր ոտքերը կը թրջէր եւ մազերով կը սրբէր, կը համբուրէր ոտքերը եւ իւղով կ՚օծէր զանոնք։ ³⁹Փարիսեցին, որ հրաւիրած էր Յիսուսը, ասիկա տեսնելով՝ ինքնիրեն կ՚ըսէր.
– Եթէ այս մարդը մարգարէ ըլլար, պէտք է գիտնար թէ ո՛վ է իրեն մօտեցող այս կինը, եւ թէ ի՛նչպիսի մեղաւոր կեանք մը կ՚ապրի ան։
⁴⁰Յիսուս Փարիսեցիին ըսաւ.
– Սիմո՛ն, քեզի ըսելիք մը ունիմ։
– Ըսէ՛, Վարդապետ, է ըսաւ ան։
⁴¹Յիսուս ըսաւ.
– Երկու հոգիներ փոխատուի մը դրամ պարտական էին. մէկը հինգ հարիւր արծաթ դրամ, միւսը՝ յիսուն։ ⁴²Երբ անոնք չկրցան դրամը վերադարձնել, պարտատէրը երկուքին ալ պարտքը ջնջեց։ Հիմա դո՛ւն ըսէ, այս երկու պարտապաններէն ո՞ր մէկը աւելի պիտի սիրէ զայն։
⁴³Սիմոն պատասխանեց.
– Ինծի այնպէս կը թուի թէ ան՝ որուն աւելի շատ շնորհեց։
– Ճի՛շդ դատեցիր, է ըսաւ Յիսուս։
⁴⁴Ապա դառնալով դէպի կինը, շարունակեց.
–Սիմո՛ն, կը տեսնե՞ս այս կինը։ Տունդ մտայ, բայց ոտքերս լուալու համար ջուր չտուիր, մինչ ասիկա իր արցունքներով ոտքերս թրջեց եւ մազերովը սրբեց։ ⁴⁵Դուն բարի գալուստի համբոյր մը չտուիր ինծի, մինչ ասիկա տունդ մտնելէս ի վեր չդադրեցաւ ոտքերս համբուրելէ։ ⁴⁶Դուն գլուխս իւղով չօծեցիր, մինչ ասիկա ոտքերս օծեց անուշահոտ իւղով։ ⁴⁷Ուստի կ՚ըսեմ քեզի, քանի զիս շատ սիրեց՝ ներուած են անոր բազմաթիւ մեղքերը։ Որովհետեւ անոր որ աւելի կը ներուի՝ անիկա աւելի սէր ցոյց կու տայ, իսկ անոր որ քիչ կը ներուի՝ աւելի քիչ կը սիրէ։
⁴⁸Ապա կնոջ դառնալով՝ ըսաւ.
– Մեղքերդ ներուած են։
⁴⁹Անոնք որոնք միասին նստած էին, սկսան իրենք իրենց ըսել.
– Ո՞վ է այս մարդը, որ նոյնիսկ մեղքերը կը ներէ։
⁵⁰Իսկ Յիսուս կնոջ ըսաւ.
– Հաւատքդ քեզ փրկեց. խաղաղութեամբ գնա։