ՄԱՏԹԷՈՍ 8

1 I 2 I 3 I 4 I 5 I 6 I 7 I 8 I 9 I 10 I 11 I 12 I 13 I 14 I 15 I 16 I 17 I 18 I 19 I 20 I 21 I 22 I 23 I 24 I 25 I 26 I 27 I 28

Յիսուս բորոտ մը կը բժշկէ
(Մր 1.40-45, Ղկ 5.12-14)

¹Երբ Յիսուս լեռնէն վար իջաւ, մեծ բազմութիւն մը հետեւեցաւ իրեն։ ²Եւ ահա բորոտ մը իրեն մօտենալով՝ ծունկի եկաւ եւ ըսաւ.
– Տէ՛ր, եթէ ուզես՝ կրնաս զիս մաքրել։
³Յիսուս ձեռքը երկարեց, դպաւ անոր եւ ըսաւ.
– Կ՚ուզեմ, մաքրուէ՛։
Եւ անմիջապէս անոր բորոտութիւնը մաքրուեցաւ։ ⁴Յիսուս ըսաւ անոր.
– Նայէ՛, ոեւէ մէկուն բան չըսես. այլ գնա եւ դուն քեզ քահանային ցոյց տուր։ Ապա, իբրեւ ժողովուրդին վկայութիւն՝ թէ բորոտութենէդ մաքրուած ես՝ զոհդ մատուցանէ, ինչպէս որ Մովսէս հրամայած է։

Հարիւրապետին ծառային բժշկութիւնը
(Ղկ 7.1-10, Յհ 4.46-54)

⁵Երբ Յիսուս Կափառնաում մտաւ, իրեն մօտեցաւ Հռոմայեցի հարիւրապետ մը, ⁶որ կ՚աղաչէր ըսելով.
– Տէ՛ր, ծառաս տունը անդամալոյծ վիճակի մէջ է եւ սաստիկ կը տառապի։
⁷Յիսուս ըսաւ.
– Ես կու գամ ու կը բժշկեմ զայն։
⁸Հարիւրապետը պատասխանեց.
– Տէ՛ր, ես արժանի չեմ քեզ իմ յարկիս տակ ընդունելու. միայն բան մը ըսէ, եւ ծառաս պիտի առողջանայ։ ⁹Որովհետեւ ես ալ, որպէս իշխանութեան ենթակայ մարդ, ձեռքիս տակ զինուորներ ունիմ. մէկուն կ՚ըսեմ՝ «Գնա՛», եւ կ՚երթայ, ուրիշի մը կ՚ըսեմ՝ «Եկո՛ւր», եւ կու գայ. ծառայիս կ՚ըսեմ՝ «Այս բանը ըրէ», եւ կը կատարէ։
¹⁰Յիսուս երբ լսեց, հիացաւ եւ իր հետեւորդներուն ըսաւ.
– Կ՚ըսեմ ձեզի, թէ նոյնիսկ Իսրայէլի մէջ այսպիսի հաւատք ունեցող մը չգտայ։ ¹¹Գիտցէք նաեւ, թէ շատեր արեւելքէն ու արեւմուտքէն պիտի գան եւ երկինքի արքայութեան մէջ սեղան պիտի բազմին Աբրահամի, Իսահակի եւ Յակոբի հետ, ¹²իսկ անոնք որոնք երկինքի արքայութեան ժառանգորդները պէտք էր ըլլային՝ դուրսը խաւարին մէջ պիտի նետուին, ուր պիտի լան եւ ակռաները կրճտեն։
¹³Յետոյ Յիսուս հարիւրապետին ըսաւ.
– Գնա՛, ինչպէս որ հաւատացիր՝ այդպէս թող ըլլայ քեզի։
Եւ նոյն վայրկեանին հարիւրապետին ծառան բժշկուեցաւ։

Յիսուս կը բժշկէ
(Մր 1.29-34, Ղկ 4.38-41)

¹⁴Ապա Յիսուս եկաւ Պետրոսի տունը, եւ տեսաւ որ անոր զոքանչը հիւանդ պառկած էր՝ տաքութեան պատճառով։ ¹⁵Յիսուս բռնեց անոր ձեռքէն, եւ տաքութիւնը անցաւ։ Անիկա ոտքի ելլելով սկսաւ սպասարկել իրեն։
¹⁶Երբ երեկոյ եղաւ, Յիսուսի բերին բազմաթիւ դիւահարներ։ Յիսուս իր խօսքով չար ոգիները դուրս հանեց եւ բոլոր հիւանդները բժշկեց, ¹⁷որպէսզի իրականանայ Եսայի մարգարէի բերնով ըսուածը. «Անիկա մեր հիւանդութիւնները վերցուց եւ մեր ցաւերը փարատեց»։

Ամէն ինչ ձգել՝ Յիսուսի հետեւելու համար
(Ղկ 9.57-62)

¹⁸Երբ Յիսուս մեծ բազմութիւն մը տեսաւ իր շուրջ, հրամայեց իր աշակերտներուն, որ լիճին միւս կողմը երթան։ ¹⁹Օրէնքի ուսուցիչ մը մօտենալով՝ ըսաւ իրեն.
– Վարդապե՛տ, ուր որ երթաս՝ ետեւէդ պիտի գամ։
²⁰Յիսուս պատասխանեց.
– Աղուէսները որջ ունին, երկինքի թռչունները՝ բոյն, սակայն Մարդու Որդին գլուխը հանգչեցնելիք տեղ մը չունի։
²¹Ուրիշ մը, որ իր աշակերտներէն մէկն էր, ըսաւ իրեն.
– Տէ՛ր, թոյլ տուր որ նախ երթամ եւ թաղեմ հայրս։
²²Յիսուս պատասխանեց.
– Դուն հետեւէ՛ ինծի, եւ ձգէ որ մեռելները թաղեն իրենց մեռելները։

Յիսուս կը խաղաղեցնէ փոթորիկը
(Մր 4.35-41, Ղկ 8.22-25)

²³Ապա Յիսուս նաւակ մտաւ, եւ իր աշակերտները հետեւեցան իրեն։ ²⁴Յանկարծ զօրաւոր փոթորիկ մը ելաւ լիճին վրայ, այնքան՝ որ ալիքները գրեթէ նաւակը կը ծածկէին։ Բայց Յիսուս կը քնանար։ ²⁵Աշակերտները մօտեցան, արթնցուցին զինք ու ըսին.
– Տէ՜ ր, ազատէ՛ մեզ, ահա կը կորսուինք։
²⁶Յիսուս ըսաւ անոնց.
– Ինչո՞ւ այդքան կը վախնաք, թերահաւատնե՛ր։
Յետոյ ոտքի ելաւ, սաստեց հովերը եւ լիճը, եւ կատարեալ հանդարտութիւն տիրեց։ ²⁷Ամէնքն ալ հիացած կ՚ըսէին.
– Ի՜ նչ տեսակ մարդ է ասիկա, որովհետեւ նոյնիսկ հովերն ու ծովը իրեն կը հնազանդին։

Երկու դիւահարներուն բժշկութիւնը
(Մր 5.1-20, Ղկ 8.26-39)

²⁸Յիսուս երբ լիճին միւս կողմը՝ Գերգեսացիներու երկիրը եկաւ, դէմը ելան երկու դիւահարներ, որոնք ժայռափոր գերեզմաններէն եկած էին։ Ասոնք այնքան կատաղի էին, որ ոեւէ մէկը այդ ճամբայէն չէր համարձակեր անցնիլ։ ²⁹Անոնք աղաղակեցին՝ ըսելով.
– Ի՞նչ կ՚ուզես մեզմէ, Յիսո՛ւս, Աստուծո՛յ Որդի, եկար որ ժամանակէն առաջ տանջե՞ս մեզ։
³⁰Քիչ մը հեռուն խոզերու մեծ երամակ մը կ՚արածէր։ ³¹Չար ոգիները Յիսուսի կ՚աղաղակէին ըսելով.
– Եթէ մեզ դուրս պիտի հանես, թոյլ տուր որ խոզերու երամակին երթանք։
³²Յիսուս ըսաւ.
– Գացէ՛ք։
Եւ չար ոգիները դիւահարներէն ելլելով՝ գացին խոզերուն. եւ ահա խոզերու ամբողջ երամակը զառիթափէն վար դէպի լիճ խուժեց եւ հոն խեղդուեցաւ։
³³Խոզարածները փախան եւ քաղաք երթալով պատմեցին եղածը, նաեւ ինչ որ պատահած էր դիւահարներուն։ ³⁴Քաղաքի ամբողջ բնակիչները ընդառաջ ելան Յիսուսի եւ երբ զայն տեսան, աղաչեցին որ հեռանայ իրենց սահմաններէն։