John 10

Բարի եւ քաջ հովիւը

– ¹Հաստատ գիտցէք, ան որ ոչխարներուն փարախը դռնէն չի մտներ, այլ ուրիշ տեղէ կը մագլցի, անիկա գող է եւ աւազակ. ²իսկ ան որ դռնէն կը մտնէ, անիկա ոչխարներուն հովիւն է։ ³Դռնապանը դուռը կը բանայ անոր եւ ոչխարները իր ձայնին կը հետեւին։ Իրենց անուններով կը կանչէ իր ոչխարները եւ դուրս կը տանի զանոնք։ ⁴Եւ երբ իր ոչխարները դուրս կը հանէ՝ ի՛նք կ՚առաջնորդէ, եւ ոչխարները կը հետեւին իրեն, որովհետեւ իր ձայնը կը ճանչնան։ ⁵Օտարին չեն հետեւիր. ընդհակառակը, կը փախչին անկէ, որովհետեւ օտարներուն ձայնը չեն ճանչնար։
⁶Յիսուս այս առակը խօսեցաւ անոնց, սակայն անոնք չհասկցան թէ ի՛նչ ըսել կ՚ուզէր իրենց։ ⁷Ուստի Յիսուս կրկին ըսաւ անոնց.
– Հաստատ գիտցէք, թէ ե՛ս եմ ոչխարներուն դուռը։ ⁸Բոլոր անոնք որոնք ինձմէ առաջ եկան, գող էին եւ աւազակ. բայց ոչխարները անոնց չհետեւեցան։ ⁹Ե՛ս եմ դուռը։ Ով որ ինձմէ անցնելով ներս մտնէ՝ պիտի փրկուի. պիտի մտնէ եւ ելլէ եւ ճարակ գտնէ։ ¹⁰Գողը կու գայ միայն գողնալու, սպաննելու եւ փճացնելու համար։ Ես եկայ՝ որպէսզի կեանք ունենան, եւ լեցուն կեանք ունենան։
¹¹Ե՛ս եմ իրաւ հովիւը։ Իրաւ հովիւը իր կեանքը կու տայ ոչխարներուն համար. ¹²մինչ վարձկանը, որ հովիւ չէ եւ որուն չեն պատկանիր ոչխարները, երբ կը տեսնէ որ գայլը կու գայ՝ կը լքէ ոչխարները ու կը փախչի, ձգելով որ գայլը յափշտակէ եւ ցրուէ ոչխարները, ¹³որովհետեւ վարձկանը չի մտահոգուիր ոչխարներուն վիճակով։ ¹⁴Ե՛ս եմ իրաւ հովիւը։ Կը ճանչնամ ոչխարներս եւ անոնք ալ զիս կը ճանչնան, ¹⁵այնպէս՝ ինչպէս Հայրը զիս կը ճանչնայ եւ ես՝ Հայրը։ Ես կեանքս կու տամ ոչխարներուս համար։ ¹⁶Տակաւին ուրիշ ոչխարներ ալ ունիմ, որոնք այս փարախէն դուրս են. պարտաւոր եմ զանոնք եւս ներս բերել։ Անոնք ալ ինծի մտիկ պիտի ընեն, եւ պիտի ըլլան մէկ հօտ՝ մէկ հովիւով։ ¹⁷Հայրը զիս կը սիրէ, որովհետեւ կեանքս կու տամ՝ վերստին առնելու համար զայն։ ¹⁸Ոչ ոք կրնայ կեանքս ինձմէ խլել։ Ես իմ կամքովս կեանքս կու տամ։ Իրաւունք ունիմ զայն տալու, ինչպէս նաեւ իրաւունք ունիմ զայն կրկին առնելու։ Ահա այսպէս պատուիրեց Հայրս ինծի։
¹⁹Դարձեալ երկպառակութիւն ինկաւ Հրեաներուն մէջ՝ այս խօսքերուն պատճառով։ ²⁰Անոնցմէ շատեր կ՚ըսէին.
– Դեւ կայ անոր ներսիդին եւ խենթացած է. ինչո՞ւ մտիկ կ՚ընէք իրեն։
²¹Բայց ուրիշներ ալ կ՚ըսէին.
– Ըսած խօսքերը դիւահարի խօսքեր չեն. միթէ դեւը կրնա՞յ կոյրի մը աչքերը բանալ։

Յիսուս՝ Աստուծոյ Որդին

²²Ձմեռ էր. Երուսաղէմի մէջ տաճարին նաւակատիքի տօնակատարութիւնը տեղի կ՚ունենար։ ²³Յիսուս տաճարին Սողոմոնի սիւնագաւիթին մէջ կ՚երթեւեկէր, ²⁴երբ իր շուրջ հաւաքուեցան Հրեաները եւ հարցուցին.
– Մինչեւ ե՞րբ մեր հոգին պիտի հանես. եթէ դուն ես Քրիստոսը՝ յստակ ըսէ մեզի։
²⁵Յիսուս պատասխանեց.
– Արդէն իսկ ձեզի ըսած եմ, սակայն չէք հաւատար։ Այն գործերը որ Հօրս անունով կը կատարեմ, անոնք իսկ կը վկայեն՝ թէ ով եմ ես։ ²⁶Բայց դուք չէք հաւատար, որովհետեւ իմ ոչխարներէս չէք։ ²⁷Ես ոչխարներս կը ճանչնամ. անոնք ձայնս կը լսեն եւ կը հետեւին ինծի, ²⁸եւ ես անոնց յաւիտենական կեանք կու տամ. անոնք բնաւ պիտի չկորսուին։ Ոչ ոք պիտի կարենայ զանոնք յափշտակել իմ ձեռքէս։ ²⁹Հայրս այդ ոչխարները ինծի տուաւ, եւ ոչ ոք կրնայ յափշտակել զանոնք իմ Հօրս ձեռքէն, որովհետեւ Հայրս բոլորէն աւելի մեծ է։ ³⁰Ես եւ Հայրս մէկ ենք։
³¹Հրեաները քարեր առին՝ քարկոծելու համար զինք։ ³²Յիսուս ըսաւ անոնց.
– Հօրս կողմէ բազմաթիւ բարի գործեր կատարեցի ձեր ներկայութեան, անոնցմէ ո՞ր մէկուն համար կ՚ուզէք քարկոծել զիս։
³³Հրեաները պատասխանեցին.
– Բարի գործերուդ համար չէ որ կ՚ուզենք քարկոծել քեզ, այլ՝ քու ըրած հայհոյութեանդ համար, որովհետեւ դուն մարդ ես եւ դուն քեզ Աստուած կ՚ընես։
³⁴Յիսուս պատասխանեց անոնց.
– Չէ՞ որ ձեր Օրէնքին մէջ գրուած է՝ «Ես ըսի թէ աստուածներ էք»։ ³⁵Ահաւասիկ Աստուած ինք «աստուածներ» կ՚անուանէ այն մարդիկը, որոնց իր խօսքը կ՚ուղղէ։ Եւ Սուրբ գիրքին ըսածը կարելի չէ ջնջել։ ³⁶Արդ, Հայրը ինք ընտրեց զիս եւ աշխարհ ղրկեց. եւ որովհետեւ ըսի թէ Աստուծոյ Որդին եմ՝ ասո՞ր համար «Կը հայհոյես» կ՚ըսէք։ ³⁷Եթէ ես իմ Հօրս ուզած գործերը չկատարեմ՝ մի՛ հաւատաք ինծի. ³⁸իսկ եթէ կը կատարեմ՝ նոյնիսկ եթէ ինծի չէք հաւատար, բայց գործերուս հաւատացէք, որպէսզի գիտնաք ու ճանչնաք թէ Հայրը իմ մէջս է եւ ես՝ Հօրս մէջ։
³⁹Դարձեալ ուզեցին բռնել Յիսուսը, բայց անիկա խոյս տուաւ անոնց ձեռքէն։ ⁴⁰Ապա կրկին գնաց Յորդանան գետին դիմացի կողմը, հոն՝ ուր Յովհաննէս նախապէս կը գտնուէր եւ կը մկրտէր։ Ու հոն մնաց։ ⁴¹Շատեր եկան իրեն. անոնք կ՚ըսէին.
– Յովհաննէս ոեւէ հրաշք չգործեց, ⁴²բայց ինչ որ ըսաւ այս մարդուն մասին՝ ճիշդ էր։
Եւ հոն շատեր հաւատացին Յիսուսի։