John 17

Յիսուս կ՚աղօթէ Եկեղեցիին համար

¹Յիսուս այս խօսքերը վերջացնելէ ետք աչքերը երկինք բարձրացուց եւ ըսաւ.
– Հա՜յր, ժամանակը հասած է, փառաւորէ՛ Որդիդ, որպէսզի Որդիդ ալ քեզ փառաւորէ։ ²Դուն անոր իշխանութիւն տուիր ամբողջ մարդկութեան վրայ, որպէսզի յաւիտենական կեանք տայ բոլոր անոնց՝ որ իրեն տուիր։ ³Եւ յաւիտենական կեանքը քեզ ճանչնա՛լն է՝ որպէս ճշմարիտ միակ Աստուած եւ ճանչնալ Յիսուս Քրիստոսը՝ որ դուն ղրկեցիր։ ⁴Երկրի վրայ ես քեզ փառաւորեցի՝ ամբողջացնելով այն գործը որ ինծի տուիր որ կատարեմ։ ⁵Եւ այժմ, ո՜վ Հայր, փառաւորէ՛ զիս այն փառքով որ ունէի քուհետդ՝ աշխարհի գոյութենէն առաջ։ ⁶Քեզ յայտնեցի բոլոր անոնց, որ ինծի տուիր այս աշխարհէն։ Անոնք քուկդ էին եւ ինծի տուիր զանոնք։ Անոնք խօսքերդ գործադրեցին ⁷եւ հիմա գիտցան թէ ինչ որ ինծի տուիր՝ քեզմէ կու գայ, ⁸որովհետեւ այն խօսքերը որ ինծի տուիր՝ ես իրենց տուի, եւ ընդունեցին ու ճշմարտապէս ճանչցան՝ որ ես քեզմէ ելայ, եւ հաւատացին թէ դուն ղրկեցիր զիս։
⁹Արդ, կ՚աղօթեմ իրենց համար։ Չեմ աղօթեր աշխարհին համար, այլ անոնց համար որ դուն ինծի տուիր, որովհետեւ անոնք քեզի կը պատկանին։ ¹⁰Ինչ որ իմս է՝ այդ բոլորը քուկդ է, եւ ինչ որ քուկդ է՝ ատիկա իմս է, եւ անոնք զիս փառաւորեցին։ ¹¹Ահա արդէն քեզի կու գամ եւ այլեւս աշխարհի մէջ չեմ, բայց անոնք աշխարհի մէջ են։ Սո՛ւրբ Հայր, անվտանգ պահէ զանոնք քու անունիդ զօրութեամբ, որովհետեւ քու անունովդ զանոնք ինծի տուիր, որպէսզի մէկ ըլլան, ինչպէս ես եւ դուն մէկ ենք։ ¹²Աշխարհի մէջ երբ անոնց հետ էի, ես կը պահէի զանոնք քու անունիդ զօրութեամբ, որովհետեւ քու անունովդ զանոնք ինծի տուիր։ Ես պահպանեցի զանոնք եւ անոնցմէ ո՛չ մէկը կորսուեցաւ, բացի անկէ՝ որ կորսուելու ճամբուն մէջ է, որպէսզի իրականանայ Սուրբ գիրքին մէջ ըսուածը։ ¹³Բայց հիմա քեզի կու գամ, եւ այս խօսքերս աշխարհի վրայ կ՚ըսեմ, որպէսզի իրենց սիրտերը լեցուին իմ կատարեալ ուրախութեամբս։ ¹⁴Ես քու պատգամդ անոնց փոխանցեցի, եւ աշխարհը ատեց զանոնք, որովհետեւ անոնք այս աշխարհինչեն պատկանիր, ինչպէս ես աշխարհին չեմ պատկանիր։ ¹⁵Չեմ խնդրեր որ զանոնք աշխարհէն վերցնես, այլ՝ զանոնք Չարէն պահես։ ¹⁶Ինչպէս որ ես այս աշխարհին չեմ պատկանիր, այնպէս ալ իրենք այս աշխարհին չեն պատկանիր։ ¹⁷Սրբագործէ՛ զանոնք քու ճշմարտութեամբդ, որովհետեւ քու խօսքդ ճշմարտութիւն է։ ¹⁸Ինչպէս որ դուն զիս աշխարհ ղրկեցիր, ես ալ զանոնք աշխարհ ղրկեցի։ ¹⁹Իրենց համար ես ինքզինքս քեզի կը նուիրաբերեմ, որպէսզի իրենք ալ ճշմարտապէս սրբագործուին։
²⁰Չեմ աղօթեր միայն իրենց համար, այլ նաեւ անոնց համար՝ որոնք անոնց քարոզութեամբ ինծի պիտի հաւատան։ ²¹Կ՚աղօթեմ որ անոնք բոլորն ալ մէկ ըլլան, ինչպէս որ դուն, ո՛վ Հայր, իմ մէջս ես եւ ես քու մէջդ, այնպէս ալ անոնք մեր մէջ ըլլան, որպէսզի աշխարհը հաւատայ, որ դուն ղրկեցիր զիս։ ²²Այն փառքը որ ինծի տուիր՝ իրենց տուի, որպէսզի մէկ ըլլան, ինչպէս որ ես եւ դուն մէկ ենք։ ²³Ես անոնց մէջ ըլլամ եւ դուն՝ իմ մէջս, այնպէս որ անոնք կատարեալ կերպով մէկ ըլլան, որպէսզի աշխարհը գիտնայ թէ դուն ղրկեցիր զիս եւ թէ սիրեցի զանոնք, ինչպէս որ դուն զիս սիրեցիր։
²⁴Հա՛յր, անոնք որոնք ինծի տուիր՝ կ՚ուզեմ որ ինծի հետ ըլլան՝ ո՛ւր որ ըլլամ, որպէսզի տեսնեն իմ փառքս, այն փառքը՝ որ ինծի տուիր, որովհետեւ զիս սիրեցիր աշխարհի ստեղծագործութենէն առաջ։ ²⁵Արդա՛ր Հայր, թէեւ աշխարհը քեզ չճանչցաւ, բայց ես քեզ ճանչցայ. եւ ասոնք ալ գիտցան թէ դուն ղրկեցիր զիս։ ²⁶Քեզ ճանչցուցի անոնց եւ պիտի շարունակեմ ճանչցնել, որպէսզի անոնց մէջ ըլլայ այն սէրը որով զիս սիրեցիր եւ ես ըլլամ անոնց մէջ։