John 2

Կանայի հարսանիքը

¹Յիսուսի Գալիլեա հասնելուն երրորդ օրը հարսանիք մը կար Կանա քաղաքին մէջ, եւ Յիսուսի մայրը հոն էր։ ²Յիսուս եւ իր աշակերտներն ալ հրաւիրուած էին հարսանիքին։ ³Երբ գինին պակսեցաւ, Յիսուսի մայրը իրեն ըսաւ.
– Գինի չունին։
– ⁴Մա՜յր, մեզի ի՛նչ,– պատասխանեց Յիսուս,– իմ ժամանակս տակաւին չէ՛ հասած։
⁵Սակայն իր մայրը ըսաւ սպասաւորներուն.
– Ինչ որ ըսէ ձեզի՝ կատարեցէ՛ք։
⁶Հրեաներու ծիսական մաքրութեան սովորութեան համաձայն, հոն քարէ վեց կարասներ կային, որոնցմէ իւրաքանչիւրը ութսունէն հարիւր լիթր կ՚առնէր։ ⁷Յիսուս ըսաւ սպասաւորներուն.
– Կարասները ջուրով լեցուցէք։
Եւ սպասաւորները լեցուցին մինչեւ բերան։ ⁸Յետոյ ըսաւ անոնց.
– Հիմա առէք եւ սեղանապետին տարէք։
Անոնքալտարին։ ⁹Սեղանապետը համտեսեց գինիի փոխուած ջուրը, բայց չգիտցաւ թէ ուրկէ էր. թէեւ սպասաւորները, որոնք ջուրը լեցուցած էին, գիտէին։ Այն ատեն սեղանապետը փեսային ¹⁰ըսաւ.
– Ամէն մարդ նախ ընտիր գինին կը հրամցնէ, իսկ երբ գինովնան՝ այն ատեն հասարակը, մինչ դուն ընտիր գինին պահեր ես մինչեւ հիմա։
¹¹Յիսուս իր այս առաջին հրաշքը կատարեց Գալիլեայի Կանա քաղաքին մէջ։ Հոն ան իր փառքը յայտնեց, եւ աշակերտները հաւատացին իրեն։
¹²Այս դէպքէն ետք՝ Յիսուս իր մօրը, եղբայրներուն եւ աշակերտներուն հետ Կափառնաում գնաց եւ քանի մը օր հոն մնաց։

Յիսուս տաճար կ՚երթայ
(Մտ 21.12-13, Մր 11.15-17, Ղկ 19.45-46)

¹³Հրեաներուն Զատիկը մօտ էր, եւ Յիսուս Երուսաղէմ գնաց։ ¹⁴Տաճարին մէջ տեսաւ արջառ, ոչխար եւ աղաւնի ծախողները, ինչպէս նաեւ լումայափոխները, որոնք նստած էին սեղաններու ետին։ ¹⁵Չուանէ խարազան մը շինեց եւ սկսաւ տաճարէն դուրս հանել բոլորը, իրենց ոչխարներով եւ արջառներով. լումայափոխներուն պղնձադրամները ցիրուցան ըրաւ եւ անոնց սեղանները շրջեց։ ¹⁶Իսկ աղաւնեվաճառներուն ըսաւ.
– Վերցուցէ՛ք ատոնք հոսկէ եւ Հօրս տունը վաճառատան մի՛ վերածէք։
¹⁷Այն ատեն իր աշակերտները յիշեցին Սուրբ գիրքին մէջ գրուածը. «Տանդ հանդէպ ունեցած նախանձախընդրութիւնս զիս պիտի այրէ»։ ¹⁸Սակայն Հրեայ ղեկավարները հարցուցին Յիսուսի.
– Ի՞նչ նշանով կրնաս ցոյց տալ մեզի, թէ իրաւունք ունիս այս բաները ընելու։
¹⁹Յիսուս պատասխանեց.
– Քանդեցէ՛ք այս տաճարը, եւ երեք օրէն ես պիտի վերաշինեմ զայն։
²⁰Հրեաները ըսին.
– Դուն երեք օրէ՞ն պիտի վերաշինես. քառասունվեց տարի առաւ ասոր շինութիւնը։
²¹Բայց տաճարը, որուն մասին Յիսուս կը խօսէր, իր մարմինն էր։ ²²Եւ երբ ինք մեռելներէն յարութիւն առաւ, աշակերտները յիշեցին թէ ա՛յդ էր ըսածը եւ հաւատացին Սուրբ գիրքին մէջ գրուածին եւ Յիսուսի խօսքին։

Յիսուսի առաջին Զատիկը Երուսաղէմի մէջ

²³Զատիկի տօնին, մինչ Յիսուս Երուսաղէմ կը գտնուէր, շատեր հաւատացին իրեն, երբ տեսան անոր գործած հրաշքները։ ²⁴Սակայն Յիսուս ինքզինք չէր վստահեր անոնց, որովհետեւ բոլորն ալ կը ճանչնար ²⁵եւ պէտք չունէր ոեւէ մէկուն մասին ուրիշին վկայութեան, քանի ինք գիտէր թէ ի՛նչ կայ մարդոց սիրտին մէջ։