John 9

Ի ծնէ կոյրին բժշկութիւնը

¹Երբ Յիսուս կ՚անցնէր, տեսաւ ի ծնէ կոյր մարդ մը։ ²Աշակերտները հարցուցին իրեն.
– Վարդապե՛տ, մեղքը որո՞ւնն է որ այս մարդը կոյր ծնած է. ի՞րն է, թէ իր հօրն ու մօրը։
³Յիսուս պատասխանեց.
– Մեղքը ո՛չ իրն է, ո՛չ ալ հօրն ու մօրը։ Կոյր ծնած է, որպէսզի Աստուծոյ զօրութիւնը յայտնի ըլլայ իրմով։ ⁴Այնքան ատեն որ ցերեկ է, պէտք է կատարեմ զիս ղրկողին գործերը։ ⁵Գիշերը կու գայ, երբ ոչ ոք կրնայ աշխատիլ։ Քանի դեռ աշխարհի մէջ եմ՝ աշխարհի լոյսն եմ։
⁶Ասիկա ըսելէ ետք՝ թքեց գետին, թուքով ցեխ շինեց եւ ծեփեց կոյրին աչքերը, ⁷եւ ըսաւ անոր.
– Գնա՛ եւ աչքերդ լուա Սելովամի աւազանին մէջ։ (Սելովամ կը նշանակէ՝ ղրկուած)։
Կոյրը գնաց, աչքերը լուաց եւ երբ վերադարձաւ՝ արդէն կը տեսնէր։ ⁸Դրացիները եւ անոնք որոնք նախապէս տեսած էին կոյրը, որ կը մուրար, ըսին.
– Ասիկա չէ՞ այն մարդը, որ կը նստէր կը մուրար։
⁹Ոմանք կ՚ըսէին.
– Ինքն է։
Ուրիշներ կ՚ըսէին.
– Ո՛չ, ինքը չէ, այլ իրեն նմանող մէկն է։
Բայց ինք կ՚ըսէր.
– Ես այդ կոյրն եմ։
– ¹⁰Բայց ինչպէ՞ս եղաւ որ աչքերդ բացուեցան,– հարցուցին անոնք։
¹¹Անիկա պատասխանեց.
– Յիսուս անունով մէկը ցեխ շինեց, ծեփեց աչքերս եւ ըսաւ ինծի. «Գնա՛ Սելովամ եւ աչքերդ լուա»։ Գացի, աչքերս լուացի եւ ահա կը տեսնեմ։
– ¹²Ո՞ւր է ան,– հարցուցին անոնք։
Պատասխանեց.
– Չեմ գիտեր։
Փարիսեցիները կը հարցաքննեն բժշկուած կոյրը
¹³Յետոյ անոնք երբեմնի կոյր մարդը տարին Փարիսեցիներուն։ ¹⁴Օրը Շաբաթ էր, երբ Յիսուս ցեխ շինած էր եւ կոյրին աչքերը բացած։ ¹⁵Փարիսեցիներն ալ հարցուցին իրեն, թէ ի՛նչպէս կ՚ըլլայ որ կը տեսնէ։ Անիկա պատասխանեց.
– Ցեխ դրաւ աչքերուս. յետոյ աչքերս լուացի եւ հիմա կը տեսնեմ։
¹⁶Փարիսեցիներէն ոմանք ըսին.
– Այդ մարդը չի կրնար Աստուծմէ ըլլալ, քանի Շաբաթ օրը չի պահեր։
Ուրիշներ սակայն կ՚ըսէին.
– Իսկ ինչպէ՞ս կրնայ մեղաւոր մարդ մը այսպիսի հրաշքներ կատարել։
Եւ երկպառակութիւն ինկաւ անոնց մէջ։ ¹⁷Ուստի Փարիսեցիները անգամ մը եւս հարցուցին մարդուն.
– Դո՞ւն ինչ կ՚ըսես այդ մարդուն համար, որ քու աչքերդ բացաւ։
– Մարգարէ մըն է,– պատասխանեց մարդը։
¹⁸Բայց Հրեայ ղեկավարները չէին ուզեր հաւատալ, թէ անիկա կոյր էր եւ հիմա կը տեսնէ։ Ուստի անոր ծնողները կանչեցին ¹⁹եւ հարցուցին անոնց.
– Ասիկա՞ է ձեր զաւակը. կ՚ըսէիք թէ կոյր ծնած է. աղէկ, ինչպէ՞ս կ՚ըլլայ որ հիմա կը տեսնէ։
²⁰Ծնողները պատասխանեցին.
– Գիտենք որ ասիկա է մեր զաւակը եւ գիտենք որ կոյր ծնաւ. ²¹բայց թէ այժմ ի՞նչպէս կը տեսնէ՝ չենք գիտեր, կամ թէ ո՞վ բացաւ անոր աչքերը՝ ատ ալ չենք գիտեր։ Իրե՛ն հարցուցէք, արդէն չափահաս է։ Թող ի՛նք խօսի իր մասին։
²²Ծնողները այսպէս ըսին, Հրեայ ղեկավարներէն վախնալով, որովհետեւ անոնք համաձայնած էին ժողովարանէն դուրս դնել ան՝ որ կը հաւատար թէ Յիսուսը Քրիստոսն է, Օծեալը։ ²³Ասոր համար էր որ անոր ծնողները ըսին. «Ինք արդէն չափահաս է, իրե՛ն հարցուցէք»։
²⁴Կրկին կանչեցին մարդը, որ կոյր էր, եւ ըսին իրեն.
– Փառք տուր Աստուծոյ. մենք գիտենք թէ այդ մարդը մեղաւոր մըն է։
²⁵Անիկա պատասխանեց.
– Չեմ գիտեր, թէ այդ մարդը մեղաւո՞ր է թէ ոչ. բայց մէկ բան գիտեմ, թէ կոյր էի եւ հիմա կը տեսնեմ։
– ²⁶Ի՞նչ ըրաւ քեզի,– հարցուցին անոնք,– Ի՞նչպէս բացաւ աչքերդ։
²⁷Մարդը պատասխանեց.
– Դեռ նոր ըսի ձեզի, բայց դուք չէք ուզեր մտիկ ընել։ Ինչո՞ւ կ՚ուզէք անգամ մըն ալ լսել. արդեօք դո՞ւք ալ կ՚ուզէք անոր աշակերտ դառնալ։
²⁸Անոնք սկսան նախատել զինք եւ ըսին.
– Դո՛ւն ես անոր աշակերտը. մենք Մովսէսի աշակերտ ենք։ ²⁹Գիտենք որ Աստուած Մովսէսի հետ խօսեցաւ, բայց ասիկա՝ չենք գիտեր թէ ուրկէ՛ է։
³⁰Մարդը պատասխանեց.
– Զարմանալին ալ այդ է, որ դուք չէք գիտեր թէ անիկա ուրկէ է, եւ սակայն անիկա իմ աչքերս բացաւ։ ³¹Գիտենք որ Աստուած մեղաւորներուն մտիկ չ՚ըներ, բայց կը լսէ անոնց՝ որոնք աստուածապաշտ են եւ իր կամքը կը կատարեն։ ³²Աշխարհի սկիզբէն ի վեր լսուած բան չէ, որ մէկը ի ծնէ կոյրի մը աչքերը բացած ըլլայ։ ³³Եթէ այդ մարդը Աստուծմէ եկած չըլլար, բան մըն ալ պիտի չկրնար ընել։
³⁴Անոնք պատասխանեցին.
– Ամբողջութեամբդ մեղքի մէջ ծնած ես, եւ մեր գլխուն ուսուցի՞չ կ՚ուզես ըլլալ։
Եւ ժողովարանէն դուրս դրին զայն։

Հոգիի կուրութիւնը

³⁵Յիսուս լսեց թէ անոնք դուրս դրեր են մարդը, եւ երբ գտաւ զայն՝ հարցուց անոր.
– Դուն կը հաւատա՞ս Աստուծոյ Որդիին։
³⁶Անիկա պատասխանեց.
– Տէ՛ր, ո՞վ է, որպէսզի հաւատամ անոր։
³⁷Յիսուս ըսաւ.
– Դուն արդէն տեսար զայն. քեզի հետ խօսողն է։
– ³⁸Կը հաւատամ, Տէ՛ր,– ըսաւ ան եւ երկրպագեց անոր։
³⁹Յիսուս ըսաւ.
– Դատաստան ընելու եկայ այս աշխարհը, որպէսզի չտեսնողները տեսնեն եւ անոնք որ կը տեսնեն՝ կուրնան։
⁴⁰Փարիսեցիներէն ոմանք, որ շուրջն էին, լսեցին ասիկա եւ հարցուցին.
– Արդեօք մե՞նք ալ կոյր ենք։
⁴¹Յիսուս անոնց պատասխանեց.
– Եթէ կոյր ըլլայիք՝ մեղք պիտի չունենայիք. բայց քանի կ՚ըսէք թէ կը տեսնէք, կը նշանակէ՝ թէ ձեր մեղաւոր ըլլալը կը հաստատէք։