Luke 21

Այրի կնոջ լուման
(Մր 12.41-44)

¹Մինչ Յիսուս իր շուրջը կը դիտէր, տեսաւ մեծահարուստներ, որոնք իրենց նուէրները կը նետէին տաճարի գանձանակին մէջ։ ²Երբ տեսաւ աղքատ այրի մըն ալ, որ երկու լումայ նետեց գանձանակին մէջ, ³ըսաւ իր աշակերտներուն.
– Վստահ գիտցէք, որ այդ աղքատ այրին բոլորէն աւելի նետեց գանձանակին մէջ։ ⁴Միւսները բոլորն ալ իրենց աւելորդ գումարներէն նուիրեցին Աստուծոյ, մինչ անիկա՝ հակառակ կարօտեալ ըլլալուն, իր ամբողջ ապրուստը նետեց։

Տաճարի աւերումին մասին
(Մտ 24.1-22, Մր 13.1-2)

⁵Ոմանք տաճարին մասին խօսելով՝ կ՚ըսէին թէ գեղեցիկ քարերով եւ աշտարակներով զարդարուած է։ ⁶Յիսուս ըսաւ.
– Այս բոլորը որ կը տեսնէք՝ պիտի քանդուին. օր պիտի գայ, երբ քար քարի վրայ պիտի չմնայ։

Նեղութիւններ եւ հալածանքներ
(Մտ 10.17-22, 24.3-14, Մր 13.3-13)

⁷Անոնք հարցուցին.
– Վարդապե՛տ, ե՞րբ պիտի ըլլայ ատիկա։ Ի՞նչ նշանով պիտի գիտնանք թէ ե՛րբ ատիկա պիտի պատահի։
⁸Յիսուս ըսաւ.
– Զգոյշ եղէք. չխաբուի՛ք։ Շատեր իմ անունովս պիտի գան եւ ըսեն. «Ես եմ Քրիստոսը», կամ՝ «Ժամանակը հասած է»։ Բայց մի՛ հետեւիք անոնց։ ⁹Մի՛ սարսափիք, երբ լսէք պատերազմներու եւ խռովութիւններու մասին, որովհետեւ պէտք է որ նախ անոնք պատահին։ Սակայն ատիկա չի՛ նշանակեր թէ արդէն աշխարհի վախճանն է։
¹⁰Եւ շարունակեց.
– Ազգեր իրարու դէմ պիտի կռուին եւ թագաւորութիւններ՝ թագաւորութիւններու դէմ։ ¹¹Զօրաւոր երկրաշարժներ տեղի պիտի ունենան եւ զանազան տեղեր՝ սով եւ համաճարակ։ Երկինքէն սարսափազդու եւ մեծամեծ նշաններ պիտի երեւին։ ¹²Բայց այս բոլորէն առաջ ձեզ պիտի ձերբակալեն եւ հալածեն, ձեզ պիտի դատեն ժողովարաններու մէջ եւ բանտ նետեն. իմ պատճառովս ձեզ պիտի տանին թագաւորներու եւ կառավարիչներու դիմաց։ ¹³Ասիկա ձեզի առիթ պիտի ըլլայ վկայութիւն տալու իմ մասիս։ ¹⁴Այժմէն իսկ ձեր միտքերուն մէջ ըլլայ, որ սկիզբէն չմտածէ՛ք թէ ինչ պատասխան պիտի տաք, ¹⁵որովհետեւ ես ձեզի պէտք եղած խօսքը եւ իմաստութիւնը պիտի տամ, որուն պիտի չկրնան հակառակիլ կամ պատասխան տալ ձեր բոլոր հակառակորդները։ ¹⁶Նոյնիսկ ձեր ծնողները, եղբայրները, ազգականներն ու բարեկամները պիտի մատնեն ձեզ եւ պիտի սպաննեն ձեզմէ ոմանք։ ¹⁷Ամէն մարդ պիտի ատէ ձեզ՝ իմ պատճառովս։ ¹⁸Սակայն ձեր գլուխէն մազ մը իսկ պիտի չկորսուի։ ¹⁹Եւ ձեր համբերութեամբ պիտի փրկէք ձեր հոգիները։

Երուսաղէմի աւերումին մասին
(Մտ 24.15-21, Մր 13.14-19)

²⁰Երբ տեսնէք Երուսաղէմը զօրքերով շրջապատուած, գիտցէք որ անոր աւերումը մօտեցած է։ ²¹Այն ատեն անոնք որ Հրէաստանի մէջ են՝ թող լեռները փախչին, անոնք որ Երուսաղէմի մէջ են՝ թող քաղաքէն դուրս ելլեն, իսկ անոնք որ շրջակայքն են՝ թող քաղաք չմտնեն։ ²²Որովհետեւ այդ օրերը աստուածային դատաստանի եւ պատիժի օրեր են, որպէսզի իրականանան Սուրբ գիրքերուն մէջ բոլոր գրուածները։ ²³Բայց այդ օրերուն վա՜յ է եկեր յղիներուն եւ ստնտու կիներուն, որովհետեւ երկիրը մեծ տագնապի պիտի մատնուի եւ Աստուծոյ բարկութիւնը այս ժողովուրդին վրայ պիտի գայ։ ²⁴Անոնք սրամահ պիտի ըլլան կամ գերի պիտի տարուին բոլոր ազգերուն մէջ։ Երուսաղէմը ազգերուն ոտքի կոխան պիտի ըլլայ, մինչեւ որ ազգերուն ժամանակը լրանայ։

Մարդու Որդիին գալուստը
(Մտ 24.29-35, Մր 13.24-31)

– ²⁵Արեւուն, լուսինին եւ աստղերուն հետ կապ ունեցող նշաններ պիտի պատահին։ Աշխարհի բոլոր ժողովուրդները տագնապի եւ շփոթութեան պիտի մատնուին ահեղ ձայներէն, որոնք կարծես ծովու ալեկոծումի գոչումը ըլլան։ ²⁶Աշխարհի վրայ պատահելիքներու ակնկալութենէն մարդիկ սարսափէն պիտի նուաղին, որովհետեւ երկնային մարմինները պիտի սասանին։ ²⁷Եւ այն ատեն պիտի տեսնեն Մարդու Որդին, որ կու գայ ամպերուն վրայ՝ զօրութեամբ եւ մեծ փառքով: ²⁸Եւ երբ ասոնք սկսին պատահիլ, շտկուեցէք եւ ձեր գլուխները բարձրացուցէք, որովհետեւ ձեր փրկութիւնը մօտ է։
²⁹Ապա Յիսուս օրինակ մըն ալ տուաւ անոնց, ըսելով.
– Նայեցէ՛ք թզենիին եւ բոլոր միւս ծառերուն։ ³⁰Երբ տեսնէք որ ծիլ կը սկսին արձակել՝ կը գիտնաք թէ ամառը մօտ է։ ³¹Նոյնպէս ալ, երբ տեսնէք որ ըսածներս կը կատարուին՝ գիտցէք թէ Աստուծոյ արքայութիւնը մօտ է։ ³²Վստահ եղէք, որ այս սերունդը չանցած՝ ասոնք բոլորը պիտի պատահին։ ³³Նոյնիսկ եթէ երկինքն ու երկիրը անհետանան, խօսքերս պիտի չանհետանան։

Արթուն մնալու անհրաժեշտութիւնը

– ³⁴Գալով ձեզի, ուշադի՛ր եղէք ձեր անձերուն։ Չըլլայ որ ձեր սիրտերը գրաւուին կերուխումով, արբեցութեամբ եւ աշխարհիկ հոգերով, եւ յանկարծ այդ օրը ձեր վրայ գայ։ ³⁵Որովհետեւ այդ օրը պիտի գայ ծուղակի պէս՝ բոլոր մարդոց, որոնք ամբողջ աշխարհի վրայ կ՚ապրին։ ³⁶Ուստի արթուն եղէք եւ միշտ աղօթեցէք, որ արժանի ըլլաք այս պատահելիքներէն ազատելու եւ Մարդու Որդիին ներկայութեան կանգնելու։
³⁷Յիսուս ամբողջ օրը տաճարին մէջ կ՚ուսուցանէր, իսկ երեկոյեան կ՚երթար Ձիթենեաց կոչուած լեռը՝ գիշերելու։ ³⁸Առաւօտ կանուխ ամբողջ ժողովուրդը տաճար կ՚երթար զինք լսելու համար։