Luke 3

Յովհաննէս Մկրտիչի քարոզութիւնը
(Մտ 3.1-12, Մր 1.1-8, Յհ 1.19-28)

¹Տիբերիոս կայսրին գահակալութեան տասնըհինգերորդ տարին Պոնտացի Պիղատոս Հրէաստանի կառավարիչն էր, Հերովդէս Գալիլեայի չորրորդապետն էր, Հերովդէսի եղբայրը՝ Փիլիպպոս, Իտուրիայի եւ Տրաքոնիտիսի չորրորդապետն էր, Լիսանիաս Աբիլենէի չորրորդապետն էր, ²իսկ Հաննա եւ Կայիափա այդ ժամանակուան Քահանայապետներն էին։
³Այդ օրերուն Աստուած անապատին մէջ խօսեցաւ Զաքարիայի որդիին՝ Յովհաննէսի։ է Յովհաննէս Յորդանան գետին եզերքը գտնուող բոլոր շրջանները երթալով՝ կը քարոզէր ապաշխարել եւ մկրտուիլ, որպէսզի Աստուած մեղքերու թողութիւն տայ։ ⁴Այս մասին Եսայի մարգարէի գիրքին մէջ գրուած է.–
«Անապատին մէջ աղաղակողին ձայնը կ՚ըսէ.–
Պատրաստեցէ՛ք Տիրոջ ճանապարհը,
հարթեցէ՛ք անոր շաւիղները։
⁵Բոլոր ձորերը պիտի լեցուին
եւ բոլոր լեռներն ու բլուրները
գետնին պիտի հաւասարին.
բոլոր ճամբաները ուղիղ պիտի ըլլան,
ինչպէս նաեւ խորտուբորտ արահետները՝
հարթ հաւասար,
⁶եւ ամբողջ մարդկութիւնը պիտի տեսնէ
Աստուծոյ ղրկած Փրկիչը»։
⁷Բազմաթիւ մարդիկ Յովհաննէսի կ՚երթային անկէ մկրտուելու համար։ Յովհաննէս անոնց կ՚ըսէր.
– Իժերո՛ւ ծնունդներ, ո՞վ ըսաւ ձեզի թէ կրնաք Աստուծոյ տալիք պատիժէն փախչիլ։ ⁸Ասկէ ետք գործո՛վ ցոյց տուէք թէ ապաշխարած էք։ Մի՛ կրկնէք դուք ձեզի՝ ըսելով. «Մենք Աբրահամի որդիներ ենք»։ Կ՚ըսեմ ձեզի, թէ Աստուած քարերէն ալ կրնայ Աբրահամի որդիներ հանել։
⁹Ահաւասիկ կացինը ծառերը իրենց արմատներէն կտրելու պատրաստ է։ Այն ծառը որ լաւ պտուղ չի տար՝ պիտի կտրուի եւ կրակ նետուի։
– ¹⁰Ուրեմն ի՞նչ ընենք,– հարցուց ժողովուրդը իրեն։
¹¹Յովհաննէս պատասխանեց.
– Ով որ երկու հագուստ ունի՝ թող մէկը չունեցողին տայ, իսկ ով որ ուտելիք ունի՝ նոյնպէս ուրիշին հետ թող կիսէ։
¹²Մաքսաւորներն ալ մկրտուելու եկան եւ հարցուցին իրեն.
– Վարդապե՛տ, ի՞նչ ընենք։
¹³Յովհաննէս պատասխանեց.
– Ձեզի հրամայուածէն աւելի մի՛ գանձէք։
¹⁴Զինուորներ ալ եկան եւ իրեն հարցուցին.
– Մե՞նք ինչ ընենք։
Անոնց պատասխանեց.
– Ոեւէ մէկէն բռնութեամբ եւ կամ զրպարտութիւն ընելով դրամ մի՛ առնէք։ Ձեզի տրուած թոշակով գոհացէք։
¹⁵Ժողովուրդը կը սկսէր իր ակնկալած Փրկիչը տեսնել Յովհաննէսի մէջ. բոլորն ալ իրենք իրենց կը խորհէին թէ արդեօք Յովհաննէ՞սն է Քրիստոսը: ¹⁶Յովհաննէս անոնց պատասխանեց.
– Ես ձեզ ջուրով կը մկրտեմ, բայց ինձմէ աւելի հզօրը պիտի գայ, որ ձեզ Սուրբ Հոգիով եւ կրակով պիտի մկրտէ։ Ես անոր կօշիկին կապերն իսկ քակելու արժանի չեմ։ ¹⁷Հեծանոցը իր ձեռքին, ան պիտի մաքրէ իր կալը. ցորենը հաւաքէ իր շտեմարանին մէջ, իսկ յարդը այրէ անշէջ կրակով։
¹⁸Տակաւին ուրիշ շատ մը ուսուցումներով անիկա ժողովուրդը կը քաջալերէր՝ փրկութեան աւետիսը տալով անոնց։
¹⁹Յովհաննէս յանդիմանեց Հերովդէս չորրորդապետը, իր եղբօր կինը՝ Հերովդիան խլելով անոր հետ ամուսնանալուն համար, ինչպէս նաեւ բոլոր իր չար գործերուն համար։ ²⁰Այս պատճառով Հերովդէս բանտարկել տուաւ Յովհաննէսը, այսպիսով չար գործ մըն ալ աւելցնելով միւսներուն վրայ։

Յիսուսի մկրտութիւնը
(Մտ 3.13-17, Մր 1.9-11)

²¹Ներկայ ամբողջ ժողովուրդը մկրտուելէն ետք՝ Յիսուս ալ մկրտուեցաւ։ Երբ Յիսուս կ՚աղօթէր, երկինքը բացուեցաւ ²²եւ Սուրբ Հոգին տեսանելի կերպարանքովաղաւնիի պէս իջաւ անոր վրայ։ Ձայն մը լսուեցաւ երկինքէն, որ կ՚ըսէր.
– Դո՛ւն ես իմ սիրելի Որդիս. քեզի՛ հաճեցայ։

Յիսուսի ազգատոհմը
(Մտ 1.1-17)

²³Յիսուս շուրջ երեսուն տարեկան էր, երբ իր գործունէութեան սկսաւ։ Ինչպէս մարդիկ կը կարծէին՝ անիկա որդին էր Յովսէփի, որուն նախահայրերն էին՝ հօրմէն սկսեալ՝ Յակոբ, Հեղի, ²⁴Մատթատ, Ղեւի, Մելքի, Յաննէ, Յովսէփ, ²⁵Մատաթիա, Ամոս, Նաւում, Եսլի, Նակկէ, ²⁶Մահաթ, Մատաթիա, Սեմէին, Եոսէք, Եոդա, ²⁷Եոանան, Ռէսա, Զօրաբաբէլ, Սալաթիէլ, Նէրի, ²⁸Մելքի, Ադդի, Կոսամ, Ելմադամ, Էր, ²⁹Յեսու, Եղիազար, Եորիմ, Մատթատ, Ղեւի, ³⁰Սիմէոն, Յուդա, Յովսէփ, Եոնամ, Եղիակիմ, ³¹Մելեա, Մեննա, Մատտաթա, Նաթան, Դաւիթ, ³²Յեսսէ, Օբէդ, Բոազ, Սալմոն, Նաասոն, ³³Ամինադաբ, Արամ, Ադմին, Առնի, Հեսրոն, Փերեզ, Յուդա, ³⁴Յակոբ, Իսահակ, Աբրահամ, Թարա, Նաքոր, ³⁵Սերուք, Ռագաւ, Փալեկ, Եբեր, Սելա, ³⁶Կայնան, Արփաքսադ, Սեմ, Նոյ, Լամեք, ³⁷Մաթուսալա, Ենոք, Եարեդ, Մալալիէլ, Կայնան, ³⁸Ենոս, Սէթ եւ Ադամ, որ Աստուծմէ ստեղծուեցաւ։