Mark 12

Չար մշակներուն առակը
(Մտ 21.33-46, Ղկ 20.9-19)

¹Յիսուս սկսաւ առակներով խօսիլ ժողովուրդինեւ ըսաւ.
– Մէկը այգի մը տնկեց, չորս կողմէն ցանկապատեց, հնձանի համար փոսը փորեց, աշտարակ մըն ալ շինեց եւ զայն վարձու տուաւ մշակներու, իսկ ինք ուրիշ երկիր գնաց։ ²Այգեկութքի ժամանակ ծառայ մը ղրկեց մշակներուն մօտ, որպէսզի այգիի բերքէն իր բաժինը առնէ մշակներէն։ ³Մշակները ծառան բռնեցին, ծեծեցին եւ ձեռնունայն ետ ղրկեցին։ ⁴Ապա ուրիշ ծառայ մը ղրկեց. բայց մշակները անոր գլուխը վիրաւորեցին եւ անպատուելով ետ ղրկեցին։ ⁵Ուրիշ ծառայ մըն ալ ղրկեց, եւ այս անգամ մշակները սպաննեցին զայն։ Այգիին տէրը ուրիշ ծառաներ ալ ղրկեց, սակայն մշակները անոնցմէ ոմանք ծեծեցին եւ ոմանք ալ սպաննեցին։
⁶Այգիին տիրոջ համար միակ անձը որ կը մնար՝ իր սիրելի որդին էր։ Ամենէն վերջը զայն ղրկեց մշակներունմօտ, մտածելով. «Թերեւս իմ որդիէս պատկառին»։ ⁷Բայց մշակները երբ տեսան որդին, որ կու գայ, իրարու ըսին. «Ասիկա է ժառանգորդը, եկէք սպաննենք զայն, որպէսզի ժառանգութիւնը մեզի մնայ»։ ⁸Ապա բռնեցին զայն, սպաննեցին եւ դիակը այգիէն դուրս նետեցին։ ⁹Հիմա, այգիին տէրը ի՞նչ պիտի ընէ մշակներուն։ Անշուշտ պիտի գայ, սպաննէ մշակները եւ այգին յանձնէ ուրիշներու։ ¹⁰Արդարեւ, Սուրբ գիրքերուն մէջ չէ՞ք կարդացած.–
«Այն քարը որ շինողները մերժեցին գործածել,
յետոյ անկիւնաքար եղաւ։
¹¹Ասիկա Տէրը կատարեց,
ու մեր աչքերուն սքանչելի է»։
¹²Հրեայ ղեկավարները հասկնալով որ իրենց համար ըսաւ առակը, ուզեցին ձերբակալել Յիսուսը, բայց ժողովուրդէն վախնալով ձգեցին գացին։

Տուրք վճարելու հարցը
(Մտ 22.15-22, Ղկ 20.20-26)

¹³Ապա անոնք Յիսուսի ղրկեցին քանի մը Փարիսեցիներ եւ Հերովդէսի կողմնակիցներ, որպէսզի իրենց հարցումներով զայն ծուղակը ձգեն։ ¹⁴Անոնք նենգամըտաբար հարցուցին Յիսուսի.
– Վարդապե՛տ, գիտենք որ ճշմարտախօս մէկն ես եւ բնաւ հոգ չես ըներ թէ ուրիշներ ի՛նչ կ՚ըսեն, որովհետեւ աչառութիւն չես ըներ, այլ ճշմարտութեամբ Աստուծոյ կամքը կ՚ուսուցանես։ Արդ, ըսէ՛ մեզի, մեր Օրէնքին համաձայն պէ՞տք է կայսրին տուրք տանք, թէ ոչ։ Տա՞նք թէ չտանք։
¹⁵Յիսուս հասկցաւ անոնց կեղծաւորութիւնը եւ ըսաւ.
– Կեղծաւորնե՛ր, ինչո՞ւ կը փորձէք զիս։ Բերէ՛ք ինծի արծաթ դրամ մը, որ տեսնեմ։
¹⁶Անոնք ալ բերին։ Ապա հարցուց.
– Ասիկա որո՞ւն նկարն ու արձանագրութիւնն է։
Անոնք պատասխանեցին.
– Կայսրին։
¹⁷Յիսուս ըսաւ անոնց.
– Գացէք եւ ինչ որ կայսրին կը պատկանի՝ կայսրին տուէք եւ ինչ որ Աստուծոյ՝ Աստուծոյ տուէք։
Եւ բոլորն ալ հիացան իր վրայ։

Յարութեան հարցը
(Մտ 22.23-33, Ղկ 20.27-40)

¹⁸Սադուկեցիներէն ոմանք եկան Յիսուսի մօտ։ Սադուկեցիները կ՚ըսեն՝ թէ մեռելներու յարութիւն չկայ։ Անոնք Յիսուսի ըսին.
– ¹⁹Վարդապե՛տ, Մովսէս հետեւեալ օրէնքը գրեց մեզի. «Եթէ ամուսնացած մէկը մեռնի առանց զաւակ ձգելու, թող մարդուն եղբայրը ամուսնանայ այրիին հետ, որպէսզի իր եղբօրը զաւակ տայ»։ ²⁰Ժամանակին մեր մօտ եօթը եղբայրներ կային։ Առաջինը ամուսնացաւ եւ մեռաւ առանց զաւակ ձգելու։ ²¹Երկրորդ եղբայրը ամուսնացաւ անոր կնոջ հետ եւ մեռաւ՝ առանց զաւակ ձգելու։ Երրորդն ալ, ²²եւ մինչեւ եօթներորդ եղբայրը նոյնպէս ամուսնացան այդ կնոջ հետ եւ մեռան առանց զաւակ ձգելու։ Բոլորէն վերջ կինն ալ մեռաւ։ ²³Արդ, մեռելներու յարութեան օրը, երբ անոնք յարութիւն առնեն, կինը անոնցմէ որո՞ւն պիտի պատկանի, քանի եօթն ալ ամուսնացան անոր հետ։
²⁴Յիսուս պատասխանեց.
– Գիտէ՞ք ինչու դուք մոլորած էք։ Մոլորած էք՝ որովհետեւ չէք հասկնար ո՛չ Սուրբ գիրքերը եւ ո՛չ ալ Աստուծոյ զօրութիւնը։ ²⁵Երբ մեռելները յարութիւն առնեն, մարդիկ եւ կիներ պիտի չամուսնանա՛ն, այլ երկինքի հրեշտակներուն նման պիտի ըլլան։ ²⁶Իսկ մեռելներու յարութիւն առնելուն մասին Մովսէսի գիրքին մէջ չէ՞ք կարդացած այրող մորենիին դրուագը։ Հոն Աստուած Մովսէսի ըսաւ. «Ե՛ս եմ Աբրահամի Աստուածը, Իսահակի Աստուածը եւ Յակոբի Աստուածը»։ ²⁷Կը նշանակէ թէ Աստուած մեռելներուն Աստուածը չէ՛, այլ ողջերուն։ Ուստի, դուք չափազանց մոլորած էք։

Կարեւորագոյն պատուիրանը
(Մտ 22.34-40, Ղկ 10.25-28)

²⁸Օրէնքի ուսուցիչ մը լսելով անոնց վիճաբանութիւնը, մօտեցաւ եւ տեսնելով թէ ի՛նչպէս Յիսուս լաւ պատասխանեց անոնց, հարցուց Յիսուսի.
– Ո՞րն է կարեւորագոյն պատուիրանը։
²⁹Յիսուս պատասխանեց.
– Կարեւորագոյն պատուիրանը հետեւեալն է. «Լսէ՛, Իսրայէլ, մեր Տէր Աստուածը միակ Տէրն է»։ ³⁰Եւ «Սիրէ՛ քու Տէր Աստուածդ ամբողջ սրտովդ, ամբողջ հոգիովդ, ամբողջ մտքովդ եւ ամբողջ զօրութեամբդ»։ ³¹Երկրորդը, որ ասոր նման է, ասիկա է. «Սիրէ՛ ընկերդ քու անձիդ պէս»։ Այս երկուքէն աւելի մեծ պատուիրան չկայ։
³²Օրէնքի ուսուցիչը ըսաւ.
– Ճի՛շդ է, Վարդապե՛տ, ուղիղ ըսիր՝ թէ Աստուած միակ Տէրն է եւ անկէ զատ ուրիշ Աստուած չկայ, ³³եւ պէտք է սիրել զայն ամբողջ սրտով, ամբողջ զօրութեամբ եւ ամբողջ մտքով, ինչպէս նաեւ սիրել ընկերը՝ անձին պէս, որովհետեւ ասիկա շատ աւելի կ՚արժէ քան բոլոր ողջակէզներն ու զոհերը։
³⁴Յիսուս տեսնելով անոր տուած խելացի պատասխանը, ըսաւ.
– Աստուծոյ արքայութենէն հեռու չե՛ս։
Եւ այլեւս ոչ ոք կը համարձակէր հարցում ընել Յիսուսի։

Որո՞ւն որդին է Քրիստոս
(Մտ 22.41-46, Ղկ 20.41-44)

³⁵Յիսուս տաճարին մէջ ուսուցանելու ընթացքին հարցուց ժողովուրդին.
– Օրէնքի ուսուցիչները ի՞նչպէս կ՚ըսեն՝ թէ Քրիստոս Դաւիթի Որդին է, ³⁶երբ Դաւիթ ինք Սուրբ Հոգիէն ներշնչուած՝ կ՚ըսէ.–
«Տէրը ըսաւ իմ Տիրոջս.– Աջ կողմս նստէ, մինչեւ թշնամիներդ ոտքերուդ տակ դնեմ որպէս պատուանդան»։
³⁷Եթէ Դաւիթ զայն տէր կը կոչէ, ինչպէ՞ս ուրեմն Քրիստոսը անոր որդին է։

Զգուշացէք Օրէնքի ուսուցիչներէն
(Մտ 23.1-12, Ղկ 11.43, 20.45-47)

Ժողովուրդը հաճոյքով մտիկ կ՚ընէր Յիսուսի, ³⁸որ իր ուսուցումները շարունակելով՝ կ՚ըսէր. – Զգո՛յշ եղէք Օրէնքի ուսուցիչներէն, որոնք կը սիրեն փառաւոր զգեստներով շրջիլ, հրապարակներու վրայ մարդոցմէ յարգալիր բարեւներ ընդունիլ, ³⁹ժողովարաններու մէջ առաջին աթոռները գրաւել եւ ընթրիքներու ընթացքին՝ պատուոյ տեղերը։ ⁴⁰Մէկ կողմէ այրիներուն տուները անոնց ձեռքէն կը յափշտակեն, իսկ միւս կողմէ կեղծաւորութեամբ իրենց աղօթքը կ՚երկարեն։ Ասոր համար աւելի՛ խիստ դատապարտութիւն պիտի ընդունին։

Այրի կնոջ լուման
(Ղկ 21.1-4)

⁴¹Յիսուս կեցած էր տաճարի գանձանակին մօտ եւ կը դիտէր ժողովուրդը, որ դրամ կը նետէր գանձանակին մէջ։ Շատ մը հարուստներ մեծ գումարներ նետեցին։ ⁴²Աղքատ այրի մըն ալ եկաւ եւ նետեց երկու լումայ, որ քանի մը դահեկան կ՚ընէ։ ⁴³Յիսուս մօտը կանչեց իր աշակերտները եւ ըսաւ անոնց. – Վստա՛հ գիտցէք, որ այս թշուառ այրին բոլորէն շատ դրամ նետած եղաւ գանձանակին մէջ, ⁴⁴որովհետեւ միւսները իրենց աւելորդ գումարներէն նետեցին, մինչ անիկա, հակառակ չքաւոր ըլլալուն, ինչ որ ունէր՝ նետեց, իր ամբո՛ղջ ապրուստը։