Mark 16

Յիսուսի յարութիւնը
(Մտ 28.1-8, Ղկ 24.1-12, Յհ 20.1-10)

¹Շաբաթ օրը երբ անցաւ, Մարիամ Մագդաղենացին, Յակոբոսի մայրը՝ Մարիամը, եւ Սողոմէն գացին խունկեր գնեցին եւ պատրաստեցին, որպէսզի երթան եւ օծեն Յիսուսի մարմինը։ ²Կիրակի առաւօտ կանուխ, արեւածագին, գերեզման եկան։
– ³Ո՞վ պիտի գլորէ գերեզմանի մուտքին դրուած քարը,– կը հարցնէին իրարու, ⁴որովհետեւ քարը շատ մեծ էր։
Սակայն երբ նայեցան, տեսան որ քարը արդէն իսկ գլորուած էր։ ⁵Գերեզմանէն ներս մտան եւ ճերմակ զգեստ հագած երիտասարդ մը տեսան, որ աջ կողմը նստած էր, եւ սարսափեցան։ ⁶Երիտասարդը ըսաւ անոնց.
– Մի՛ վախնաք, գիտեմ որ խաչուած Նազովրեցի Յիսուսը կը փնտռէք, բայց հոս չէ՛, յարութիւն առաւ։ Տեսէ՛ք, զինք հոս դրած էին։ ⁷Այժմ գացէք, ըսէք իր աշակերտներուն եւ Պետրոսի, որ ահա ինք ձեզմէ առաջ կ՚երթայ Գալիլեա. հո՛ն պիտի տեսնէք զինք, ինչպէս որ ըսած էր ձեզի։ ⁸Երբ ասիկա լսեցին, դուրս փախան գերեզմանէն, զարհուրած ու ապշահար, եւ ոչ մէկուն բան մը ըսին, որովհետեւ կը վախնային։

Յիսուս կ՚երեւի Մարիամ Մագդաղենացիին
(Մտ 28.9-10, Յհ 20.11-18)

⁹Յիսուս յարութիւն առնելէ ետք, Կիրակի առաւօտ կանուխ, նախ երեւցաւ Մարիամ Մագդաղենացիին, որմէ եօթը չար ոգիներ դուրս հանած էր։ ¹⁰Մարիամ գնաց իր ընկերակիցներուն պատմեց ասիկա, մինչ անոնք կը սգային ու կու լային։ ¹¹Սակայն անոնք չհաւատացին, երբ լսեցին թէ ողջ է եւ Մարիամ տեսեր է զայն։

Յիսուս կ՚երեւի երկու աշակերտներու
(Ղկ 24.13-35)

¹²Յետոյ Յիսուս ուրիշ կերպարանքով երեւցաւ անոնցմէ երկուքին, երբ անոնք գիւղ կ՚երթային։ ¹³Ասոնք եւս վերադարձան եւ միւսներուն պատմեցին, բայց ասոնց ալ չհաւատացին։

Յիսուս կ՚երեւի տասնըմէկ աշակերտներուն
(Մտ 28.16-20, Ղկ 24.36-49, Յհ 20.19-23, Գրծ 1.6-8)

¹⁴Վերջը Յիսուս երեւցաւ տասնըմէկ աշակերտներուն, երբ անոնք սեղան բազմած էին։ Յանդիմանեց զիրենք իրենց անհաւատութեան եւ յամառութեան համար, քանի չէին հաւատացած անոնց՝ որոնց ինք երեւցած էր մեռելներէն յարութիւն առնելէն ետք։ ¹⁵Եւ ըսաւ անոնց.
– Գացէք ամբողջ աշխարհը եւ բոլոր մարդոց քարոզեցէք Աւետարանը։ ¹⁶Ով որ հաւատայ եւ մկրտուի՝ պիտի փրկուի, իսկ ով որ չհաւատայ՝ պիտի դատապարտուի։ ¹⁷Անոնք որոնք կը հաւատան՝ հետեւեալ նշաններով յայտնի պիտի ըլլան.– Իմ անունովս չար ոգիներ պիտի հանեն, նոր լեզուներ պիտի խօսին, ¹⁸ձեռքով օձ պիտի բռնեն առանց խայթուելու եւ եթէ մահացու ոեւէ թոյն խմեն՝ պիտի չվնասուին, հիւանդներու վրայ ձեռք պիտի դնեն եւ զանոնք բժշկեն։

Յիսուսի համբարձումը
(Ղկ 24.50-53, Գրծ 1.9-11)

¹⁹Տէր Յիսուս աշակերտներուն հետ խօսելէ ետք երկինք համբարձաւ եւ Հօրը աջ կողմը նստաւ։ ²⁰Իսկ անոնք աշխարհի բոլոր կողմերը երթալով՝ Տիրոջ գործակցութեամբ Աւետարանը կը քարոզէին, եւ իրենց քարոզութիւնը կը հաստատուէր իրենց տրուած բոլոր նշաններով։