Mark 1

Յովհաննէս Մկրտիչի քարոզութիւնը
(Մտ 3.1-12, Ղկ 3.1-18, Յհ 1.19-28)

¹Այսպէս կը սկսի Աստուծոյ Որդիին՝ Յիսուս Քրիստոսի Աւետարանը։
²Եսայի մարգարէի գիրքին մէջ գրուած է.–
«Ահաւասիկքուառջեւէդկը ղրկեմիմպատգամաբերս,
որ քեզի համար ճամբայ պատրաստէ։
³Անապատին մէջ աղաղակողին ձայնը կ՚ըսէ.–
Պատրաստեցէ՛ք Տիրոջ ճանապարհը,
հարթեցէ՛ք անոր շաւիղները»։
⁴Եւ ահա Յովհաննէս անապատին մէջ կը մկրտէր։ Անիկա կը քարոզէր ապաշխարել եւ մկրտուիլ՝ որպէսզի Աստուած մեղքերու թողութիւն տայ։ ⁵Իրեն կ՚երթային ամբողջ Հրէաստանի եւ Երուսաղէմի բնակիչներէն շատեր եւ իրենց մեղքերը խոստովանելով՝ կը մկրտուէին անկէ Յորդանան գետին մէջ։
⁶Յովհաննէս ուղտի մազէ շինուած հագուստ մը հագած էր եւ մէջքին կապած կաշիէ գօտի մը։ Իր կերակուրը մարախ եւ վայրի մեղր էր։ ⁷Կը քարոզէր, ըսելով.
– Ան որ ինձմէ ետք պիտի գայ՝ ինձմէ աւելի հզօր է, որուն առջեւ ծռելով՝ կօշիկներուն կապերն անգամ քակելու արժանի չեմ։ ⁸Ես ձեզ ջուրով մկրտեցի, բայց անիկա ձեզ Սուրբ Հոգիով պիտի մկրտէ։

Յիսուսի մկրտութիւնն ու փորձութիւնը
(Մտ 3.13—4.11, Ղկ 3.21-22, 4.1-13)

⁹Այդ օրերուն Յիսուս Գպլիլեպյի Նազարէթ քաղաքէն եկաւ եւ Յովհաննէսի կողմէ մկրտուեցաւ Յորդանան գետին մէջ։ ¹⁰Նոյն պահուն, երբ Յիսուս ջուրէն դուրս կ՚ելլէր, տեսաւ երկինքը բացուած եւ Աստուծոյ Հոգին՝ որ աղաւնիի նման կ՚իջնէր իր վրայ։ ¹¹Երկինքէն ձայն մը լսուեցաւ, որ կ՚ըսէր.
– Դո՛ւն ես իմ սիրելի Որդիս, որուն ես հաճեցայ։
¹²Մկրտուելէն անմիջապէս ետք Հոգին տարաւ զինք անապատ, ¹³ուր անիկա քառասուն օրեր մնաց՝ Սատանայէն փորձուելով։ Հոն գազաններուն հետ էր, եւ հրեշտակները իրեն կը սպասաւորէին։

Յիսուս չորս ձկնորսներկը կանչէ
(Մտ 4.12-22, Ղկ 4.14-15, 5.1-11, Յհ 1.35-42)

¹⁴Յովհաննէսի բանտարկութենէն ետք, Յիսուս Գալիլեա եկաւ։ Անիկա Աստուծոյ Աւետարանը կը քարոզէր, ¹⁵ըսելով.
– Փրկութեան ժամանակը հասած է եւ եկած՝ Աստուծոյ արքայութիւնը. ապաշխարեցէք եւ հաւատացէ՛ք Աւետարանին։
¹⁶Յիսուս երբ Գալիլեայի լիճին եզերքէն կ՚անցնէր, տեսաւ երկու ձկնորսներ՝ Սիմոնը եւ անոր եղբայրը՝ Անդրէասը, որոնք ուռկանը ջուրը նետած՝ ձուկ կ՚որսային։ ¹⁷Յիսուս ըսաւ անոնց.
– Հետեւեցէ՛ք ինծի, եւ ես ձեզ մարդու որսորդ պիտի ընեմ։
¹⁸Անոնք անմիջապէս ձգեցին ուռկանները եւ հետեւեցան Յիսուսի։
¹⁹Քիչ մը առաջ երթալով, Յիսուս տեսաւ Զեբեդէոսի որդիները՝ Յակոբոսը եւ եղբայրը՝ Յովհաննէսը, որոնք նաւակին մէջ էին եւ իրենց ուռկանները կարգի կը դնէին։ ²⁰Իսկոյն զանոնք ալ կանչեց։ Անոնք իրենց հայրը՝ Զեբեդէոսը վարձականներուն հետ ձգեցին նաւակին մէջ եւ հետեւեցան Յիսուսի։

Պիղծ ոգիով մարդուն բժշկութիւնը
(Ղկ 4.31-37)

²¹Մտան Կափառնաում։ Շաբաթ օրը, Յիսուս ժողովարան գնաց եւ սկսաւ ուսուցանել։ ²²Բոլորն ալ կը զարմանային անոր ուսուցման կերպին վրայ, որովհետեւ հեղինակութեամբ կ՚ուսուցանէր եւ ո՛չ թէ Օրէնքի ուսուցիչներուն պէս։ ²³Ժողովարանին մէջ մէկը կար, պիղծ ոգիէ բռնուած, որ աղաղակեց.
– ²⁴Յիսո՛ւս Նազովրեցի, ձգէ՛, ի՞նչ կ՚ուզես մեզմէ. մեզ ոչնչացնելո՞ւ եկար. գիտենք թէ ո՛վ ես. դուն Աստուծոյ Սուրբն ես։
²⁵Յիսուս սաստեց ոգին եւ ըսաւ.
– Լռէ՛ եւ դո՛ւրս ել մարդէն։
²⁶Պիղծ ոգին զգետնեց մարդը, բարձրաձայն աղաղակեց եւ դուրս ելաւ անկէ։ ²⁷Բոլորն ալ ապշահար իրարու կ՚ըսէին.
– Այս ի՜նչ նոր ուսուցում է, որովհետեւ հեղինակութեամբ կը սաստէ պիղծ ոգիները եւ անոնք դուրս կ՚ելլեն։
²⁸Եւ շուտով Յիսուսի համբաւը տարածուեցաւ Գալիլեա նահանգին բոլոր կողմերը։

Յիսուս կը բժշկէ
(Մտ 8.14-17, Ղկ 4.38-42)

²⁹Ժողովարանէն ելլելէ անմիջապէս ետք Յիսուս Յակոբոսի եւ Յովհաննէսի հետ գնաց Սիմոնի եւ Անդրէասի տունը։ ³⁰Սիմոնի զոքանչը տաքութիւն ունէր եւ այս մասին Յիսուսի ըսին։ ³¹Յիսուս մօտեցաւ անոր եւ ձեռքէն բռնելով՝ ոտքի հանեց։ Տաքութիւնը անցաւ եւ անիկա սկսաւ սպասարկել իրենց։
³²Երբ երեկոյ եղաւ, արեւնամուտին, Յիսուսի բերին բոլոր հիւանդներն ու դիւահարները: ³³Քաղաքին ամբողջ ժողովուրդը տան դրան առջեւ հաւաքուած էր։ ³⁴Յիսուս բազմաթիւ հիւանդներ բժշկեց, որոնք զանազան ցաւերէ բռնուած էին եւ շատ մը չար ոգիներ հանեց։ Եւ չէր ձգեր որ ոգիները խօսին, որովհետեւ անոնք գիտէին թէ ինք Քրիստոսն է։

Յիսուս Գալիլեայի մէջ կը քարոզէ
(Մտ 4.23, Ղկ 4.42-44)

³⁵Յաջորդ առաւօտ կանուխ Յիսուս ելաւ ամայի վայր մը գնաց եւ հոն սկսաւ աղօթել։ ³⁶Սիմոն եւ իրեն հետ եղողները ելան զինք փնտռելու։ ³⁷Երբ գտան, ըսին անոր.
– Ամէն մարդ քեզ կը փնտռէ։
³⁸Յիսուս ըսաւ.
– Եկէք մօտակայ ուրիշ գիւղաքաղաքներ ալ երթանք, որպէսզի հոն եւս քարոզեմ, որովհետեւ ճիշդ ատոր համար Աստուած զիս ղրկեց։
³⁹Եւ Գալիլեայի բոլոր շրջաններու ժողովարաններուն մէջ կը քարոզէր եւ դեւեր դուրս կը հանէր։

Յիսուս բորոտ մը կը բժշկէ
(Մտ 8.1-4, Ղկ 5.12-16)

⁴⁰Բորոտ մը եկաւ Յիսուսի մօտ եւ ծունկի իջած՝ կ՚աղաչէր, ըսելով.
– Տէ՛ր, եթէ ուզես՝ կրնաս զիս մաքրել։
⁴¹Յիսուս գթաց եւ ձեռքը երկարելով դպաւ անոր եւ ըսաւ.
– Կ՚ուզեմ, մաքրուէ՛։
⁴²Հազիւ ասիկա ըսած, իսկոյն բորոտութիւնը գնաց անկէ եւ մաքրուեցաւ։ ⁴³Յիսուս զայն անմիջապէս դուրս հանեց եւ խստիւ պատուիրեց, ըսելով.
– ⁴⁴Նայէ՛, ոեւէ մէկուն բան չըսես. այլ գնա՛, եւ դուն քեզ քահանային ցոյց տուր. ապա որպէս ժողովուրդին վկայութիւն՝ թէ բորոտութենէդ մաքրուած ես՝ զոհդ մատուցանէ, ինչպէս Մովսէս հրամայած է։
⁴⁵Բայց անիկա գնաց եւ սկսաւ ամէն տեղ պատմել ու տարածել պատահածը։ Այս պատճառով Յիսուս այլեւս չէր կրնար բացէ ի բաց քաղաք մը մտնել, այլ դուրսը ամայի տեղեր կը մնար։ Եւ ժողովուրդը ամէն կողմէ կու գար իրեն։