Luke 4

Յիսուսի փորձութիւնը
(Մտ 4.1-11, Մր 1.12-13)

¹Յիսուս Սուրբ Հոգիով լեցուած՝ վերադարձաւ Յորդանանէն։ Ապա Սուրբ հոգիին կողմէ առաջնորդուած՝ գնաց անապատ, ²ուր քառասուն օր փորձուեցաւ Սատանայէն։ Այդ օրերուն ո՛չ կերաւ եւ ո՛չ ալ խմեց։ Երբ քառասուն օրերը ամբողջացան, Յիսուս անօթեցաւ։
³Սատանան ըսաւ իրեն.
– Եթէ Աստուծոյ Որդին ես, հրամայէ՛ որ այս քարը հաց դառնայ։
⁴Յիսուս պատասխանեց.
– Օրէնքի գիրքին մէջ գրուած է. «Մարդ միայն հացով չ՚ապրիր, այլ՝ Աստուծոյ բոլոր խօսքերով»։
⁵Ապա Սատանան հանեց զինք բարձր լեռ մը եւ ակընթարթի մը մէջ իրեն ցոյց տուաւ աշխարհի բոլոր թագաւորութիւնները ⁶եւ ըսաւ.
– Այս բոլորին վրայ իշխանութիւն եւ անոնց փառքը քեզի կու տամ. անոնք ինծի տրուած են եւ որու որ ուզեմ՝ կու տամ։ ⁷Արդ, եթէ ինծի երկրպագութիւն ընես՝ այդ բոլորը քուկդպիտի ըլլան։
⁸Յիսուս ըսաւ.
– Օրէնքի գիրքին մէջ գրուած է. «Քու Տէր Աստուծոյդ պէտք է երկրպագես եւ զայն միայն պաշտես»։
⁹Յետոյ Սատանան զայն Երուսաղէմ տարաւ եւ կանգնեցուց տաճարի աշտարակներէն մէկուն վրայ եւ ըսաւ անոր.
– Եթէ Աստուծոյ Որդին ես, դուն քեզ այստեղէն վար նետէ։ ¹⁰Քանի Սաղմոսներուն մէջ գրուած է, թէ «Աստուած իր հրեշտակներուն պիտի պատուիրէ որ քեզ պահպանեն», ¹¹եւ թէ «հրեշտակները քեզ իրենց ձեռքերուն վրայ պիտի վերցնեն, այնպէս որ ոտքդքարի չզարնուի»։
¹²Յիսուս պատասխանեց.
– Օրէնքի գիրքին մէջ գրուած է. «Քու Տէր Աստուածդ չփորձե՛ս»։
¹³Սատանան ամէն տեսակի փորձութիւն վերջացնելէ ետք՝ ժամանակուան մը համար հեռացաւ Յիսուսէն։

Յիսուս Գալիլեայի մէջ իր առաքելութեան կը սկսի
(Մտ 4.12-17, Մր 1.14-15)

¹⁴Յիսուս Գալիլեա վերադարձաւ Սուրբ Հոգիին զօրութեամբ, եւ ամբողջ գաւառին մէջ իր համբաւըտարածուեցաւ։ ¹⁵Անոնց ժողովարաններուն մէջ կ՚ուսուցանէր՝ արժանանալով բոլորին հիացումին ու գովասանքին։

Յիսուս կը մերժուի Նազարէթի մէջ
(Մտ 13.53-58, Մր 6.1-6)

¹⁶Եկաւ Նազարէթ քաղաքը, ուր մեծցած էր, եւ իր սովորութեան համաձայն Շաբաթ օր ժողովարան գնաց։ Երբ ոտքի ելաւ կարդալու համար օրուան ընթերցուածը, ¹⁷իրեն տուին Եսայի մարգարէին գիրքը։ Բացաւ եւ գտաւ այն տեղը ուր կ՚ըսէր.–
¹⁸«Տիրոջ Հոգին վրաս է.
որովհետեւ զիս օծեց եւ ղրկեց՝
աղքատներուն փրկութեան աւետիս տալու,
սրտաբեկները մխիթարելու,
¹⁹գերիներուն ազատութիւն բերելու,
կոյրերուն աչքերը բանալու,
հարստահարուածները ազատելու
եւ յայտարարելու՝ թէ ահա հասած է ժամանակը,
երբ Տէրը պիտի փրկէ իր ժողովուրդը»։
²⁰Ապա գոցեց գիրքը, տուաւ պաշտօնեային եւ նստաւ։ Ժողովարանին մէջ գտնուողներուն բոլորին աչքերը իրեն սեւեռած էին ²¹երբ ըսաւ.
– Այս մարգարէութիւնը որ դուք լսեցիք, ահա այսօր իրականացաւ։
²²Ամէնքն ալ տպաւորուած էին իրմէ եւ հիանալով անոր շնորհալի խօսքերուն վրայ՝ կ՚ըսէին.
– Այս մարդը Յովսէփի որդին չէ՞:
²³Յիսուս ըսաւ.
– Անտարակոյս ինծի պիտի ըսէք հետեւեալ առածը. «Բժի՛շկ, դուն քեզ բժշկէ»։ Եւ ինչ որ լսեցինք որ գործեր ես Կափառնաումի մէջ, այստեղ՝ քու հայրենի գաւառիդ մէջ ալ կատարէ։
²⁴Եւ աւելցուց.
– Բայց դուք ալ գիտէք, որ մարգարէն իր ծննդավայրին մէջ յարգ չունի։ ²⁵Ձեզի օրինակներով խօսիմ։ Իսրայէլի մէջ բազմաթիւ այրիներ կային Եղիայի օրերուն, երբ երեքուկէս տարի երկինքը չանձրեւեց եւ ամբողջ երկրին մէջ սաստիկ սով տիրեց։ ²⁶Բայց Եղիա անոնցմէ ոեւէ մէկուն չղրկուեցաւ, այլ ղրկուեցաւ Սիդոնի մօտիկ Սարեփթա գիւղը բնակող այրի կնոջ մը։ ²⁷Նոյնպէս, Եղիսէ մարգարէի օրերուն Իսրայէլի մէջ բազմաթիւ բորոտներ կային, բայց անոնցմէ ո՛չ մէկը բժշկուեցաւ, այլ միայն Նէեման անունով Ասորի մը։
²⁸Այս ակնարկութիւնները լսելով՝ ժողովարանին մէջ գտնուողները բարկութեամբ լեցուեցան։ ²⁹Ելան, Յիսուսը քաղաքէն դուրս հանեցին եւ գահավէժ ընելու նպատակով զայն տարին մինչեւ կատարը այն լերան, որուն վրայ շինուած էր իրենց քաղաքը։ ³⁰Բայց Յիսուս անոնց մէջէն անցաւ գնաց։

Պիղծ ոգիով մարդուն բժշկութիւնը
(Մր 1.21-28)

³¹Յետոյ Յիսուս Գալիլեայի Կափառնաում քաղաքը գնաց, ուր Շաբաթ օրով սկսաւ ժողովուրդին ուսուցանել։ ³²Բոլորն ալ կը զարմանային անոր ուսուցման կերպին վրայ, որովհետեւ հեղինակութեամբ կը խօսէր։
³³Ժողովարանին մէջ մէկը կար, որ պիղծ ոգիէ բռնուած էր. ոգին բարձրաձայն գոչեց.
– ³⁴Յիսո՛ւս Նազովրեցի, ձգէ՛, ի՞նչ կ՝ուզես մեզմէ.
մեզ ոչնչացնելո՞ւ եկար. գիտե՛նք թէ ով ես, դուն Աստուծոյ Սուրբն ես։
³⁵Յիսուս սաստեց ոգին եւ ըսաւ.
– Լռէ՛ եւ դո՛ւրս ել մարդէն։
Ոգին բոլորին դիմաց զգետնեց մարդը եւ դուրս ելաւ՝ առանց վնասելու անոր։ ³⁶Բոլորն ալ ապշահար՝ իրարու կ՚ըսէին.
– Ի՜նչ զօրեղ խօսք. հեղինակութեամբ եւ զօրութեամբ կը սաստէ չար ոգիները եւ անոնք դուրս կ՚ելլեն։

³⁷Եւ Յիսուսի համբաւը կը տարածուէր գաւառին բոլոր կողմերը։

Յիսուս կը բժշկէ
(Մտ 8.14-17, Մր 1.29-34)

³⁸Ժողովարանէն ելլելով՝Յիսուս գնաց Սիմոնի տունը։ Սիմոնի զոքանչը սաստիկ տաքութիւն ունէր եւ կը տանջուէր անկէ։ Յիսուսի աղաչեցին որ բժշկէ զայն։ ³⁹Յիսուս անոր մօտ գնաց եւ սաստեց տաքութիւնը։ Տաքութիւնը անցաւ, եւ հիւանդը անմիջապէս ոտքի ելլելով՝ սկսաւ սպասարկել անոնց։
⁴⁰Արեւնամուտին, բոլոր անոնք որոնք զանազան ցաւերէ բռնուած հիւանդներ ունէին, Յիսուսի բերին։ Յիսուս անոնցմէ իւրաքանչիւրին վրայ իր ձեռքերը դնելով՝ կը բժշկէր զանոնք։ ⁴¹Շատերու մէջէն դեւեր ալ կ՚ելլէին, որոնք բարձրաձայն կ՚ըսէին.
– Դուն Աստուծոյ Որդին ես։
Սակայն Յիսուս կը սաստէր զանոնք եւ չէր ձգեր որ խօսին, քանի դեւերը գիտէին թէ ինք Քրիստոսն է։

Յիսուս Գալիլեայի մէջ կը քարոզէ
(Մր 1.35-39)

⁴²Առաւօտուն Յիսուս ելաւ ամայի վայրմը գնաց։ Ժողովուրդը սկսաւ զինք փնտռել։ Երբ եկան իր մօտ, չէին ձգեր որ հեռանայ իրենցմէ։ ⁴³Յիսուս անոնց ըսաւ.
– Ուրիշ քաղաքներու մէջ ալ պէտք է Աստուծոյ արքայութիւնը աւետեմ, որովհետեւ ճիշդ ասոր համար Աստուած զիս ղրկեց։
⁴⁴Եւ Յիսուս Գալիլեայի ժողովարաններուն մէջ կը քարոզէր։