Matthew 15

1 I 2 I 3 I 4 I 5 I 6 I 7 I 8 I 9 I 10 I 11 I 12 I 13 I 14 I 15 I 16 I 17 I 18 I 19 I 20 I 21 I 22 I 23 I 24 I 25 I 26 I 27 I 28

Նախնիքներու ուսուցումները
(Մր 7.1-13)

¹Այն ատեն Յիսուսի մօտեցան Փարիսեցիներ եւ Օրէնքի ուսուցիչներ, որոնք Երուսաղէմէն եկած էին, եւ ըսին.
²Ինչո՞ւ աշակերտներդ մեր նախնիքներու աւանդութիւնը կ՚անտեսեն։ Օրինակ, ճաշելէ առաջ չեն լուար իրենց ձեռքերը։
³Յիսուս անոնց պատասխանեց.
– Իսկ դո՞ւք ինչու կ՚անտեսէք Աստուծոյ պատուիրանը՝ ձեր աւանդութիւնը պահելու համար։ ⁴Որովհետեւ Աստուած կ՚ըսէ.
«Պատուէ՛ հայրդ ու մայրդ», ⁵եւ ուրիշ տեղ մը կ՚ըսէ. «Ով որ իր հայրը կամ մայրը անիծէ՝ մահուան պիտի դատապարտուի»։ ⁶Մինչ դուք կ՚ըսէք. – «Ով որ իր հօր կամ մօր ըսէ՝ «Այն օգնութիւնը որ ինձմէ պիտի ստանայիր՝ Աստուծոյ նուիրուած է», պարտաւոր չէ՛ յարգելու իր հայրն ու մայրը»։ Ահա այսպիսով դուք Աստուծոյ խօսքը կ՚անարգէք՝ ձեր աւանդութիւնը պահելու համար։ ⁷Կեղծաւորնե՛ր, Եսայի մարգարէ ճիշդ մարգարէացած է ձեր մասին, երբ կ՚ըսէ.–
«Այս ժողովուրդը միայն
շրթունքներով զիս կը պատուէ,
մինչ իր սիրտը շատ հեռու է ինձմէ։
⁹Պարապ տեղ զիս կը պաշտեն,
որովհետեւ իրենց սորվեցուցածները
մարդոց կողմէ տրուած պատուիրաններ են»։

Ի՞նչն է որ մարդս կ՚ապականէ
(Մր 7.14-23)

¹⁰Յետոյ Յիսուս իր մօտ կանչեց ժողովուրդը եւ ըսաւ անոնց.
– Մտիկ ըրէք ու լա՛ւ հասկցէք։ ¹¹Բերնէն մտածը չէ՛ որ կը պղծէ մարդը, այլ ինչ որ դուրս կ՚ելլէ բերնէն՝ ա՛յն է որ կը պղծէ մարդը։
¹²Այն ատեն աշակերտները մօտեցան իրեն եւ ըսին.
– Գիտե՞ս որ Փարիսեցիները երբ ըսածդ լսեցին, գայթակղեցան։
¹³Յիսուս անոնց պատասխանեց.
– Ոեւէ տունկ որ երկնաւոր Հայրս չէ տնկած՝ արմատախիլ պիտի ըլլայ։
¹⁴Ձգեցէ՛ք զիրենք, կոյրեր են՝ կոյրերու առաջնորդ։ Երբ կոյրը ուրիշ կոյր մը կ՚առաջնորդէ՝ երկուքն ալ փոսը կ՚իյնան։
¹⁵Պետրոս խօսք առնելով ըսաւ Յիսուսի.
– Բացատրէ՛ մեզի այդ առակը։
¹⁶Յիսուս ըսաւ.
– Տակաւին դո՞ւք ալ անմիտ էք։ ¹⁷Չէ՞ք հասկնար, թէ ինչ որ մարդուս բերանը կը մտնէ՝ անոր ստամոքսը կ՚երթայ եւ ապա դուրս կ՚ելլէ։ ¹⁸Մինչդեռ ինչ որ մարդուս բերանէն կ՚ելլէ՝ սիրտէն դուրս կու գայ, եւ ատիկա է որ կը պղծէ մարդս։ ¹⁹Որովհետեւ մարդուս սիրտէն է որ կ՚ելլեն չար մտածումները՝ սպանութիւն, շնութիւն, պոռնկութիւն, գողութիւն, սուտ վկայութիւն, հայհոյութիւն։ ²⁰Ասո՛նք են որ կը պղծեն մարդը եւ ո՛չ թէ անլուայ ձեռքով ճաշ ուտելը։

Քանանացի կնոջ հաւատքը
(Մր 7.24-30)

²¹Ապա Յիսուս հոնկէ ելլելով գնաց Տիւրոսի եւ Սիդոնի շրջանները։ ²²Եւ ահա Քանանացի կին մը, որ այդ կողմերէն էր, եկաւ Յիսուսի մօտ եւ բարձրաձայն ըսաւ.
– Տէ՜ ր, Դաւիթի՛ Որդի, ողորմէ՛ ինծի, աղջիկս չար ոգիէն սաստիկ կը տանջուի։
²³Բայց Յիսուս չպատասխանեց անոր։ Ասոր վրայ աշակերտները մօտեցան եւ աղաչելով ըսին.
– Ճամբէ՛ զինք, որովհետեւ մեր ետեւէն կ՚աղաղակէ։
²⁴Յիսուս պատասխանեց.
– Ես միայն Իսրայէլի ժողովուրդին կորսուած ոչխարներուն համար ղրկուեցայ։
²⁵Սակայն կինը մօտեցաւ, ծունկի եկաւ ու ըսաւ.
– Տէ՜ ր, օգնէ՛ ինծի։
²⁶Յիսուս պատասխանեց.
– Ճիշդ չէ՛ մանուկներուն ձեռքէն հացը առնել եւ շուներուն նետել։
²⁷Կինը ըսաւ.
– Այո՛, Տէ՜ ր, բայց նոյնիսկ շուները իրենց տիրոջ սեղանէն ինկած փշրանքներով կը կերակրուին։
²⁸Այն ատեն Յիսուս անոր պատասխանեց.
– Ո՛վ կին, մեծ է հաւատքդ. թող ուզածիդ պէս ըլլայ։
Եւ նոյն վայրկեանին անոր աղջիկը բժշկուեցաւ։

Յիսուս շատեր կը բժշկէ

²⁹Յիսուս այդտեղէն մեկնելով գնաց Գալիլեայի լիճին եզերքը եւ լեռը ելլելով՝ հոն նստաւ։ ³⁰Մեծ բազմութիւն մը մօտեցաւ իրեն. անոնք իրենց հետ ունէին կաղեր, կոյրեր, համրեր, հաշմանդամներ եւ ուրիշ հիւանդներ, որոնք բերին եւ դրին Յիսուսի ոտքերուն առջեւ։ Եւ Յիսուս բժշկեց զանոնք։ ³¹Բոլորն ալ կը զարմանային, տեսնելով որ համրերը կը խօսին, կաղերը կը քալեն, հաշմանդամները կը բժշկուին եւ կոյրերը կը տեսնեն, եւ կը փառաւորէին Իսրայէլի Աստուածը։

Չորս հազարին կերակրումը
(Մր 8.1-10)

³²Յիսուս իր մօտ կանչեց իր աշակերտները եւ ըսաւ անոնց.
– Կը խղճամ այս բազմութեան, որովհետեւ ահա երեք օր է որ մօտս են եւ ա՛լ ոչինչ ունին ուտելիք։ Չեմ ուզեր զիրենք անօթի տուն ղրկել, որպէսզի չըլլայ թէ ճամբու ընթացքին մարին։
³³Աշակերտները ըսին.
– Հիմա ամայի այս վայրին մէջ ուրկէ՞ այսչափ բազմութիւն կշտացնելու չափ հաց գտնենք։
³⁴Յիսուս հարցուց անոնց.
– Քանի՞ հաց ունիք։
Անոնք պատասխանեցին.
– Եօթը հաց եւ քիչ մըն ալ մանր ձուկեր։
³⁵Յիսուս հրամայեց ժողովուրդին որ գետին նստին։ ³⁶Ապա առաւ եօթը հացը եւ ձուկերը, շնորհակալութիւն յայտնեց Աստուծոյ, կտրեց եւ աշակերտներուն տուաւ, ու ասոնք ալ բաժնեցին ժողովուրդին։ ³⁷Բոլորն ալ կերան ու կշտացան, եւ աշակերտները կտորները հաւաքելով եօթը զամբիւղ լեցուցին։ ³⁸Իսկ ուտողները շուրջ չորս հազար հոգի էին, կիներն ու մանուկները չհաշուած։
Յետոյ Յիսուս արձակեց ժողովուրդը եւ նաւակ ելլելով եկաւ Մագդալայի սահմանները։