Matthew 19

1 I 2 I 3 I 4 I 5 I 6 I 7 I 8 I 9 I 10 I 11 I 12 I 13 I 14 I 15 I 16 I 17 I 18 I 19 I 20 I 21 I 22 I 23 I 24 I 25 I 26 I 27 I 28

Յիսուս ապահարզանի դէմ կը խօսի
(Մտ 5.31-32, Մր 10.1-12, Ղկ 16.18)

¹Երբ Յիսուս իր ըսելիքները վերջացուց, ձգեց Գալիլեայի շրջանը եւ գնաց Հրէաստանի սահմանները՝ Յորդանան գետին միւս կողմը։ ²Իրեն հետեւեցաւ մեծ բազմութիւն մը, եւ հոն շատեր բժշկեց։
³Փարիսեցիներ Յիսուսը փորձելու մտադրութեամբ մօտեցան անոր եւ հարցուցին.
– Մեր Օրէնքով մէկը իրաւունք ունի՞ ոեւէ պատճառով իր կինը արձակելու։
⁴Յիսուս անոնց պատասխանեց.
– Չէ՞ք կարդացած Սուրբ գիրքերուն մէջ, թէ Աստուած սկիզբէն «արու եւ էգ ստեղծեց մարդիկը եւ ըսաւ անոնց. ⁵Այս պատճառով այրը պիտի ձգէ իր հայրն ու մայրը եւ իր կնոջ միանայ, եւ երկուքը մէկ մարմին պիտի ըլլան»։ ⁶Հետեւաբար այլեւս երկու չեն, այլ՝ մէկ մարմին։ Ուրեմն ոեւէ մէկը թող չբաժնէ անոնք՝ որ Աստուած միացուց։
⁷Փարիսեցիները դարձեալ հարցուցին.
– Հապա ինչո՞ւ Մովսէս օրէնք սահմանեց՝ բաժանման թուղթ տալ կնոջ եւ արձակել զայն։
⁸Յիսուս պատասխանեց.
– Մովսէս ձեր խստասրտութեան պատճառով արտօնեց արձակել ձեր կիները, սակայն ստեղծագործութեան ժամանակ արձակելու խօսք չկար։ ⁹Գիտցէք նաեւ, թէ ո՛վ որ իր կինը կ՚արձակէ առանց պոռնկութեան պատճառի եւ ուրիշ մը կ՚առնէ՝ շնութիւն ըրած կ՚ըլլայ, եւ ով որ արձակուած կինը կ՚առնէ՝ ան ալ շնութիւն ըրած կ՚ըլլայ։

Ամուսնութիւն եւ ամուրիութիւն

¹⁰Աշակերտները ըսին Յիսուսի.
– Եթէ ամուսնութիւնը այդպէս դատապարտութեան պատճառ կրնայ ըլլալ այր մարդուն եւ կնոջ համար, աւելի լաւ է չամուսնանալ։
¹¹Յիսուս ըսաւ.
– Բայց ամէն մարդ չի կրնար առանց ամուսնութեան մնալ, այլ միայն անոնք՝ որոնց Աստուած կարողութիւն տուած է։ ¹²Որովհետեւ մարդիկ չեն ամուսնանար ա՛յն պարագաներուն, երբ ծնունդով ներքինի են, կամ՝ մարդոց կողմէ ներքինի եղած են եւ կամ՝ իրենք զիրենք ներքինի դարձուցած են երկինքի արքայութեան համար։ Ով որ կրնայ ընդունիլ իմ հաստատումս, թող կատարէ զայն։

Յիսուս կ՚օրհնէ մանուկները

(Մր 10.13-16, Ղկ 18.15-17)

¹³Ժողովուրդէն ոմանք մանուկներ բերին Յիսուսի, որպէսզի ձեռք դնէ անոնց վրայ եւ աղօթէ, սակայն աշակերտները սաստեցին բերողները։ ¹⁴Յիսուս ըսաւ.
– Ձգեցէ՛ք որ մանուկները ինծի գան, արգելք մի՛ ըլլաք անոնց, որովհետեւ այդպիսիներուն է երկինքի արքայութիւնը։
¹⁵Եւ ձեռքերը դրաւ անոնց վրայ։ Ապա մեկնեցաւ հոնկէ։

Մեծահարուստ երիտասարդը
(Մտ 20.16, Մր 10.17-31, Ղկ 13.30, 18.18-30)

¹⁶Եւ ահա մէկը մօտեցաւ Յիսուսի եւ հարցուց.
– Բարի՛ Վարդապետ, ի՞նչ բարի գործ պէտք է կատարեմ, յաւիտենական կեանքը ընդունելու համար։
¹⁷Յիսուս պատասխանեց.
– Ինչո՞ւ բարիի մասին կը հարցնես ինծի։ Բարին մէկ է, միայն Աստուած բարի է։ Եթէ կ՚ուզես յաւիտենական կեանքը մտնել՝ պատուիրանները պահէ։
¹⁸Անիկա հարցուց.
– Ո՞ր պատուիրանները։
Յիսուս ըսաւ.
– Հետեւեալները.– «Մի՛ սպաններ, մի՛ շնար, մի՛ գողնար, սուտ վկայութիւն մի՛ տար, ¹⁹պատուէ՛ հայրդ ու մայրդ» եւ «Սիրէ՛ ընկերդ քու անձիդ պէս»։
²⁰Երիտասարդը ըսաւ.
– Այդ բոլորը պատանութենէս ի վեր պահած եմ. դեռ ի՞նչ կը պակսի ինծի։
²¹Յիսուս պատասխանեց.
– Եթէ կ՚ուզես կատարեալ ըլլալ, գնա՛, ինչ որ ունիս՝ ծախէ եւ աղքատներուն տուր. այդպիսով երկինքի մէջ գանձ պիտի ունենաս, եւ յետոյ՝ հետեւէ՛ ինծի։
²²Երիտասարդը երբ ասիկա լսեց՝ տրտում–տխուր գնաց, որովհետեւ շատ հարուստ էր։ ²³Յիսուս իր աշակերտներուն ըսաւ.
– Վստահ գիտցէք, որ հարուստը շատ դժուար երկինքի արքայութիւն պիտի մտնէ։ ²⁴Աւելին ալ կ՚ըսեմ ձեզի.– Պարանը շատ աւելի դիւրին ասեղի ծակէն կը մտնէ, քան հարուստը՝ Աստուծոյ արքայութիւնը։
²⁵Աշակերտները երբ ասիկա լսեցին, շատ զարմացան եւ հարցուցին.
– Ուրեմն ո՞վ կրնայ փրկուիլ։
²⁶Յիսուս նայեցաւ անոնց եւ ըսաւ.
– Մարդոց համար ատիկա անկարելի է, բայց Աստուծոյ համար ամէն բան կարելի է։
²⁷Ասոր վրայ Պետրոս ըսաւ.
– Ահա մեր ամբողջ ունեցածը ձգեցինք եւ հետեւեցանք քեզի. մե՞նք ինչ պիտի ըլլանք։
²⁸Յիսուս պատասխանեց.
– Երկրորդ գալուստին, երբ Մարդու Որդին իր փառքի աթոռին բազմի, դուք որ ինծի հետեւեցաք՝ պիտի բազմիք տասներկու գահերու վրայ, դատելու համար Իսրայէլի տասներկու ցեղերը։ ²⁹Եւ ով որ ձգեց տուն, եղբայրներ, քոյրեր, հայր ու մայր, կին ու զաւակներ եւ ագարակներ՝ ինծի համար, հարիւրապատիկը պիտի ստանայ եւ յաւիտենական կեանքը ժառանգէ։ ³⁰Բայց շատեր որոնք հիմա առաջին են՝ վերջին պիտի ըլլան, եւ շատ մը վերջին եղողներ՝ առաջին։