Matthew 16

1 I 2 I 3 I 4 I 5 I 6 I 7 I 8 I 9 I 10 I 11 I 12 I 13 I 14 I 15 I 16 I 17 I 18 I 19 I 20 I 21 I 22 I 23 I 24 I 25 I 26 I 27 I 28

Հրաշքի մը խնդրանքը
(Մտ 10.38-39, Մր 8.11-13, Ղկ 11.29-30, Ղկ 12.54-56)

¹Փարիսեցիներ ու Սադուկեցիներ մօտեցան Յիսուսի եւ զինք փորձելու համար՝ իրմէ նշան մը կ՚ուզէին, Աստուծմէ վկայուած ըլլալը հաստատելու համար։ ²Յիսուս անոնց պատասխանեց.
– Արեւնամուտին, երբ տեսնէք որ հորիզոնը կարմրած է, կ՚ըսէք. «Վաղը օդը լաւ պիտի ըլլայ»։ ³Իսկ առաւօտուն երբ երկինքը կարմրի եւ մթագնի, կ՚ըսէք. «Այսօր փոթորկոտ պիտի ըլլայ»։ Երկինքը դիտելով երբ կրնաք նախատեսել գալիք օդը, չէ՞ք կրնար ներկայ ժամանակներու նշանները տեսնելով հասկնալ անոնց իմաստը։ ⁴Աստուծոյ անհաւատարիմ եւ չար այս սերունդը նշան կը խնդրէ, բայց Յովնան մարգարէին պատահած հրաշքէն զատ ուրիշ նշան պիտի չտրուի անոր։
Եւ ձգեց զանոնք ու գնաց։

Փարիսեցիներու եւ Սադուկեցիներու խմորը
(Մր 8.14-21, Ղկ 12.1)

⁵Աշակերտներն ալ լիճին դիմացի կողմը անցան, բայց մոռցան հաց առնել։ ⁶Յիսուս անոնց ըսաւ.
– Տեսէք, զգուշացէ՛ք Սադուկեցիներու եւ Փարիսեցիներու խմորէն։
⁷Աշակերտները իրենք իրենց կը խորհէին ու կ՚ըսէին. «Այսպէս կ՚ըսէ, որովհետեւ հաց չառինք»։ ⁸Յիսուս գիտցաւ անոնց մտածումը եւ ըսաւ.
– Թերահաւատնե՛ր, ինչո՞ւ դուք ձեզի կը խորհիք թէ հաց չունիք։ ⁹Տակաւին չէ՞ք հասկնար։ Չէ՞ք յիշեր, ինչպէս հինգ հացով հինգ հազար հոգի կերակրուեցան, եւ կտորները քանի՞ սակառ լեցուցիք։ ¹⁰Կամ երբ եօթը հացով չորս հազար հոգի կերակրուեցան, քանի՞ զամբիւղ լեցուցիք։ ¹¹Արդ, ինչպէ՞ս չէք հասկնար, թէ հացի համար չէր որ ըսի ձեզի՝ զգուշացէք Փարիսեցիներու եւ Սադուկեցիներու խմորէն։
¹²Այն ատեն աշակերտները հասկցան, թէ հացի խմորի մասին չէր խօսեր, այլ կը զգուշացնէր Փարիսեցիներու եւ Սադուկեցիներու ուսուցումներէն։

Պետրոսի յայտարարութիւնը Յիսուսի մասին
(Մր 8.27-30, Ղկ 9.18-21)

¹³Երբ Յիսուս Փիլիպպոսի կառուցած Կեսարիայի կողմերը եկաւ, իր աշակերտներուն հարցուց.
– Մարդիկ ի՞նչ կ՚ըսեն Մարդու Որդիին մասին. ո՞վ եմ ես։
¹⁴Անոնք պատասխանեցին.
– Ոմանք քեզ Յովհաննէս Մկրտիչը կը կարծեն, ոմանք՝ Եղիա մարգարէն, իսկ ուրիշներ՝ Երեմիան կամ մարգարէներէն մէկը։
¹⁵Յիսուս հարցուց անոնց.
– Իսկ դո՞ւք ով կը կարծէք զիս։
¹⁶Սիմոն Պետրոս պատասխանեց.
– Դուն Քրիստոսն ես, կենդանի Աստուծոյ Որդին։
¹⁷Յիսուս ըսաւ անոր.
– Երանի՜ քեզի, Սիմոն, Յովնանի որդի, որովհետեւ ատիկա քեզի յայտնողը մարդ մը չէր, այլ իմ Հայրս, որ երկինքի մէջ է։ ¹⁸Քեզի կ՚ըսեմ՝ թէ ժայռ ես դուն, եւ այդ ժայռին վրայ պիտի շինեմ իմ եկեղեցիս, զոր մահն անգամ իր ամբողջ զօրութեամբ պիտի չկրնայ յաղթահարել։ ¹⁹Քեզի պիտի տամ երկինքի արքայութեան բանալիները, եւ ինչ որ կապես երկրի վրայ՝ կապուած պիտի ըլլայ երկինքի մէջ, եւ ինչ որ արձակես երկրի վրայ՝ արձակուած պիտի ըլլայ երկինքի մէջ։
²⁰Ապա Յիսուս խստիւ պատուիրեց իր աշակերտներուն, որ ոեւէ մէկուն չըսեն թէ ինքն է Քրիստոսը։

Յիսուս կը խօսի իր չարչարանքներուն, մահուան եւ յարութեան մասին
(Մր 8.31-33, Ղկ 9.22)

²¹Այս դէպքէն ետք, Յիսուս սկսաւ յայտնել իր աշակերտներուն, թէ պէտք է որ ինք Երուսաղէմ երթայ, ուր շատ պիտի չարչարուի աւագ քահանաներէն, Օրէնքի ուսուցիչներէն եւ երէցներէն, թէ պէտք է որ սպաննուի, եւ երրորդ օրը յարութիւն առնէ։
²²Ասոր վրայ Պետրոս զինք մէկ կողմ տարաւ եւ սկսաւ հակառակելով վիճիլ.
– Քա՛ւ լիցի, Տէ՛ր, այդպիսի բան թող չպատահի քեզի։
²³Յիսուս Պետրոսի դառնալով ըսաւ.
– Ետի՛ս գնա, Սատանա՛յ, դուն արգելք ես ինծի, որովհետեւ Աստուծոյ ծրագիրը չէ որ կը խորհիս, այլ մարդոց մտահոգութիւնը կ՚արտայայտես։

Յիսուսի հետեւելու պայմանները
(Մր 8.34—9.1, Ղկ 9.23-27)

²⁴Ապա Յիսուս իր աշակերտներուն ըսաւ.
– Եթէ մէկը ուզէ ինծի հետեւիլ՝ թող ուրանայ իր անձը, առնէ իր խաչը եւ ետեւէս գայ։ ²⁵Որովհետեւ ո՛վ որ ուզէ իր կեանքը փրկել՝ պիտի կորսնցնէ զայն, եւ ո՛վ որ ինծի համար կորսնցնէ իր կեանքը՝ պիտի գտնէ զայն։ ²⁶Ի՞նչ օգուտ, եթէ մարդ ամբողջ աշխարհը շահի, բայց իր կեանքը կորսնցնէ, որովհետեւ ի՞նչ փրկագին պիտի տայ իր կեանքը ետ առնելու համար։ ²⁷Արդարեւ, Մարդու Որդին պիտի գայ իր Հօր փառքով՝ իր հրեշտակներուն հետ, եւ այն ատեն իւրաքանչիւրին իր գործերուն համաձայն հատուցում պիտի կատարէ։ ²⁸Վստահ եղէք, որ հոս գտնուողներէն ոմանք պիտի չմեռնին՝ մինչեւ տեսնեն Մարդու Որդին որ կու գայ իր թագաւորութեամբ։