Matthew 9

1 I 2 I 3 I 4 I 5 I 6 I 7 I 8 I 9 I 10 I 11 I 12 I 13 I 14 I 15 I 16 I 17 I 18 I 19 I 20 I 21 I 22 I 23 I 24 I 25 I 26 I 27 I 28

Յիսուս անդամալոյծ մը կը բժշկէ
(Մր 2.1-12, Ղկ 5.17-26)

¹Յիսուս նաւակ մտաւ եւ լիճին միւս կողմը անցնելով եկաւ իր քաղաքը։ ²Եւ ահա մարդիկ իրեն բերին անդամալոյծ մը, մահիճին մէջ պառկած։ Յիսուս անոնց հաւատքը տեսնելով, ըսաւ անդամալոյծին.
– Քաջալերուէ՛, ո՛րդեակ, մեղքերդ ներուած են քեզի։
³Օրէնքի ուսուցիչներէն ոմանք իրենց մտքէն ըսին.
– Այս մարդուն ըրածը հայհոյութիւն է։
⁴Յիսուս գիտցաւ անոնց մտածումը եւ ըսաւ.
– Ինչո՞ւ դուք ձեզի չար բաներ կը մտածէք։ ⁵Ո՞ր մէկը աւելի դիւրին է. անդամալոյծին՝ «Մեղքերդ ներուած են քեզի» ըսե՞լը, թէ՝ «Ել եւ քալէ՛» ըսելը։ ⁶Բայց պէտք է գիտնաք թէ Մարդու Որդին երկրի վրայ իշխանութիւն ունի մեղքերը ներելու։
Ապա անդամալոյծին դառնալով ըսաւ.
– Ե՛լ, մահիճդ ա՛ռ եւ տունդ գնա։
⁷Անդամալոյծը ոտքի ելաւ եւ տուն գնաց։ ⁸Ժողովուրդը երբ ասիկա տեսաւ՝ զարմացաւ ու կը փառաւորէր զԱստուած, որ մարդոց այսպիսի կարողութիւն կու տայ։

Յիսուս կը կանչէ Մատթէոսը
(Մր 2.13-17, Ղկ 5.27-32)

⁹Յիսուս այդտեղէն քիչ մը առաջ երթալով՝ տեսաւ մաքսաւոր մը, Մատթէոս անունով, որ մաքս գանձելու նստած էր, եւ ըսաւ անոր.
– Հետեւէ՛ ինծի։
Մատթէոս ոտքի ելաւ եւ հետեւեցաւ Յիսուսի։ ¹⁰Եւ մինչ անոր տան մէջ սեղան բազմած էր, շատ մը մաքսաւորներ եւ մեղաւորներ ալ եկան եւ նստան Յիսուսի եւ իր աշակերտներուն հետ։ ¹¹Երբ Փարիսեցիները տեսան ասիկա, ըսին Յիսուսի աշակերտներուն.
– Ինչո՞ւ ձեր Վարդապետը մաքսաւորներուն եւ մեղաւորներուն հետ կ՚ուտէ։
¹²Յիսուս երբ լսեց ասիկա, ըսաւ անոնց.
– Առողջները չեն որ բժիշկի պէտք ունին, այլ՝ հիւանդները։ ¹³Գացէք եւ սորվեցէք թէ ի՛նչ կը նշանակէ Աստուծոյ սա խօսքը. «Ողորմութիւն կ՚ուզեմ եւ ո՛չ թէ զոհ»։ Որովհետեւ չեկայ արդարները կանչելու, այլ՝ մեղաւորները։

Ծոմապահութեան հարցը
(Մր 2.18-22, Ղկ 5.33-39)

¹⁴Առիթով մը Յովհաննէսի աշակերտները մօտեցան Յիսուսի եւ ըսին.
– Ինչո՞ւ մենք եւ Փարիսեցիները յաճախ ծոմ կը պահենք, իսկ քու աշակերտներդ չեն պահեր։
¹⁵Յիսուս անոնց պատասխանեց.
– Կարելի՞ է հարսանիքի հրաւիրեալներուն ըսել որ սուգ պահեն, երբ տակաւին փեսան իրենց հետ է։ Ժամանակ պիտի գայ, երբ փեսան պիտի վերցուի իրենցմէ, եւ այն ատեն իրենք ալ ծոմ պիտի պահեն։
¹⁶Ոչ ոք չլուացուած նոր կտոր մը կը գործածէ հին հագուստի մը համար կարկտան ընելու։ Որովհետեւ նոր կտորը քաշուելով՝ հագուստը կը պատռտէ, եւ աւելի մեծ կ՚ըլլայ պատռուածքը։ ¹⁷Նմանապէս, ոչ ոք նոր գինին հին տիկերու մէջ կը լեցնէ, այլապէս տիկերը կը պայթին, գինին կը թափի, եւ տիկերը կը փճանան։ Ընդհակառակը, նոր գինին նոր տիկերու մէջ կը դնեն եւ երկուքն ալ կը պահուին։

Իշխանաւորին աղջիկը եւ հիւանդ կինը
(Մր 5.21-43, Ղկ 8.40-56)

¹⁸Մինչ Յիսուս անոնց այս ուսուցումները կ՚ընէր, Հրեայ իշխանաւոր մը մօտեցաւ եւ ծունկի գալով՝ ըսաւ անոր.
– Աղջիկս նոր մեռաւ, բայց եկուր եւ ձեռքդ անոր վրայ դիր ու անիկա պիտի ողջննայ։
¹⁹Յիսուս ելաւ եւ իր աշակերտներուն հետ գնաց անոր ետեւէն։
²⁰Եւ ահա կին մը, որ տասներկու տարիէ ի վեր արիւնահոսութենէ կը տառապէր, Յիսուսի ետեւէն մօտեցաւ եւ դպաւ անոր հագուստի քղանցքին։
²¹Անիկա ինքնիրեն կը խորհէր ու կ՚ըսէր. «Միայն դպնամ անոր հագուստին եւ պիտի բժշկուիմ»։
²²Յիսուս ետեւ դարձաւ եւ կինը տեսնելով ըսաւ.
– Աղջի՛կս, քաջալերուէ՛, հաւատքդ քեզ բժշկեց։
Նոյն վայրկեանին կինը բժշկուեցաւ։
²³Երբ Յիսուս իշխանաւորին տունը եկաւ եւ տեսաւ փողահարները եւ խռոված ամբոխը, ²⁴ըսաւ անոնց.
– Մէկդի՛ կեցէք, որովհետեւ աղջիկը մեռած չէ, այլ կը քնանայ։
Բոլորն ալ սկսան ծաղրել զինք։ ²⁵Երբ բազմութիւնը դուրս ելաւ, Յիսուս մտաւ աղջկան սենեակը, բռնեց անոր ձեռքէն, եւ աղջիկը ոտքի ելաւ։
²⁶Այս լուրը ամբողջ շրջանին մէջ տարածուեցաւ։

Երկու կոյրերուն բժշկութիւնը

²⁷Եւ մինչ Յիսուս այդտեղէն կը մեկնէր, երկու կոյրեր սկսան իր ետեւէն երթալ, աղաղակելով.
– Դաւիթի՛ Որդի, ողորմէ՛ մեզի։
²⁸Երբ Յիսուս տուն մտաւ, կոյրերը մօտեցան իրեն. եւ Յիսուս հարցուց անոնց.
– Կը հաւատա՞ք թէ կրնամ բժշկել ձեզ։
Անոնք ըսին.
– Այո՛, Տէ՛ր։
²⁹Այն ատեն Յիսուս դպաւ անոնց աչքերուն եւ ըսաւ.
– Ինչպէս որ կը հաւատաք՝ թող այդպէս ըլլայ ձեզի։
³⁰Եւ անոնց աչքերը բացուեցան։ Յիսուս խստիւ պատուիրեց անոնց, ըսելով.
– Զգոյշ եղէք, որ մարդ չիմանայ։
³¹Իսկ անոնք ելան եւ Յիսուսի համբաւը տարածեցին ամբողջ շրջանին մէջ։

Համր մարդուն բժշկութիւնը
(Ղկ 11.14-15)

³²Կոյրերուն մեկնելէն ետք, Յիսուսի բերին համր դիւահար մը։ ³³Յիսուս չար ոգին դուրս հանելուն պէս՝ համրը սկսաւ խօսիլ։ Բոլորն ալ հիացան եւ ըսին.
– Այսպիսի բան տակաւին չէինք տեսած Իսրայէլի մէջ։
³⁴Իսկ Փարիսեցիները կ՚ըսէին.
– Դեւերու իշխանին միջոցաւ է որ կը հանէ չար ոգիները։

Յիսուս Գալիլեայի մէջ կը քարոզէ
(Մր 6.34, Ղկ 10.2)

³⁵Յիսուս կը շրջէր բոլոր քաղաքներն ու գիւղերը, կ՚ուսուցանէր ժողովարաններուն մէջ, Աստուծոյ արքայութեան աւետիսը կու տար եւ կը բժշկէր ժողովուրդին բոլոր ախտերն ու հիւանդութիւնները։ ³⁶Եւ տեսնելով ժողովուրդի բազմութիւնը, գթաց անոնց, որովհետեւ յոգնած էին եւ ցրուած՝ հովիւ չունեցող ոչխարներու պէս։ ³⁷Այն ատեն իր աշակերտներուն ըսաւ.
– Հունձքը առատ է, բայց մշակները՝ քիչ։ ³⁸Հետեւաբար խնդրեցէք հունձքի Տիրոջմէն, որ իր հունձքին համար մշակներ ղրկէ։